Elon Musk ប្រហែលត្រូវចូលពេទ្យវះកាត់សិន មុនឡើងវាយក្នុងទ្រុងជាមួយ Mark Zuckerberg

លោកមហាសេដ្ឋី Elon Msuk បញ្ជាក់នៅលើបណ្ដាញសង្គម X ថា លោកប្រហែលជាត្រូវពេទ្យវះកាត់ និងធ្វើការស្កេនមើលសេរីរាង្គ​នៃផ្នែក ក និងឆ្អឹងខ្នងផ្នែកខាងលើជាមុនសិន មុនឡើងប្រកួតក្នុងទ្រុងជាមួយមហាសេដ្ឋី Mark Zuckerberg ប៉ុន្តែជាក់ស្តែងចំពោះការវះកាត់ ឬមិនវះយ៉ាងណានោះ លោកនឹងបញ្ជាក់នៅសប្តាហ៍ក្រោយ ។

ប្រសិនបើ Elon Musk ដែល​មាន​អាយុ ៥២ ឆ្នាំទៅហើយ​ត្រូវ​​វះ​កាត់មែននោះ លោកនឹងត្រូវសម្រាកពីតួនាទីដ៏មមាញឹករបស់លោកនៅក្នុងក្រុមហ៊ុន មួយរយៈពេលសិនដើម្បីទុកពេលព្យាបាលជំងឺ ជាពិសេស ការប្រកួតរបស់លោក​ជា​មួយមេក្រុមហ៊ុន Meta នឹងកាន់តែអូសបន្លាយពេលយូរទៀត ។

ពាក់ព័ន្ធនឹងបញ្ហានេះដែរ មហាសេដ្ឋី Elon Musk បាននិយាយកាលពីថ្ងៃអាទិត្យថា ការប្រយុទ្ធក្នុងទ្រុងរវាងលោក និងលោក Mark Zuckerberg នឹងត្រូវផ្សាយផ្ទាល់នៅលើបណ្ដាញសង្គម X ហើយប្រាក់ចំណូលទាំងអស់នឹងផ្តល់ទៅសប្បុរសធម៌សម្រាប់អតីតយុទ្ធជន ។

គួរឲ្យដឹងថា មួយរយៈពេលនេះ មហាសេដ្ឋីទាំងពីរកំពុងតែព្យាយាមហ្វឹកហាត់យ៉ាងខ្លាំងជាមួយ​គ្រូក្បាច់គុនចម្រុះ (MMA) ល្បីៗ ដើម្បីត្រៀមថ្ងៃប្រកួតមកដល់ ខណៈមហាសេដ្ឋី Zuckerberg មានតែមជាងបន្តិច ដោយសារតែលោកជាអ្នកជំនាញ​កីឡាជឺជិតស៊ូ​ ខ្សែក្រវ៉ាត់ខ្មៅស្រាប់ ៕

ប្រែសម្រួល ៖ នាង រតនៈ

ប្រភព ៖ CNBC

ចុចអាន ៖ Elon Musk ថា ការប្រកួតវាយក្នុងទ្រុងជាមួយ Mark Zuckerberg នឹងផ្សាយ​ផ្ទាល់តាមបណ្តាញសង្គម X