ក្រោយរួមភេទជាមួយបុរសដូចគ្នា គូស្នេហ៍ឥណ្ឌូនេស៊ីត្រូវវាយជិត ៨០ រំពាត់

មន្ត្រីយុត្តិធម៌ឥណ្ឌូនេស៊ីបាននិយាយថា គូស្នេហ៍ភេទដូចគ្នាមួយគូនៅខេត្ត Aceh នៃប្រទេសឥណ្ឌូនេស៊ីកាលពីថ្ងៃព្រហស្បតិ៍ ទី២៨ ខែមករា ត្រូវបានវាយនឹងរំពាត់នៅមុខសាធារណជន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសទាំង ២ នាក់ត្រូវបានគេវាយជិត ៨០ រំពាត់ក្នុងម្នាក់ៗពីបទរួមភេទជាមួយភេទដូចគ្នាដែលជាទង្វើខុសច្បាប់នៅក្នុងខេត្ត Aceh ក្រោមច្បាប់ឥស្លាមក្នុងតំបន់ ។

អ្នកទាំងពីរដែលមិនត្រូវបានគេស្គាល់អត្តសញ្ញាណបានស៊ូទ្រាំនឹងការឈឺចាប់ និងបានសុំឲ្យបញ្ឈប់ការវាយធ្វើបាបនេះ ខណៈមន្រ្តី Syariah ដែលគ្របមុខនឹងក្រណាត់បានវាយខ្នងរបស់ពួកគេដោយរំពាត់ផ្តៅ ។

ទន្ទឹមនោះការដាក់ទណ្ឌកម្មត្រូវបានបញ្ឈប់មួយរយៈខ្លី ហើយបុរសទាំង ២ នាក់ដែលមានអាយុ ២០ ឆ្នាំត្រូវបានអនុញ្ញាតឲ្យផឹកទឹកមុនពេលបន្តការវាយធ្វើបាប ខណៈម្តាយរបស់បុរសម្នាក់បានដួលសន្លប់នៅពេលឃើញកូនប្រុសរបស់គាត់ត្រូវបានវាយធ្វើបាប ។

បុរសទាំងនោះត្រូវបានចាប់ខ្លួននៅក្នុងខែវិច្ឆិកានៅផ្ទះជួលមួយដែលម្ចាស់ផ្ទះបានរកឃើញពួកគេអាក្រាតកាយនៅក្នុងបន្ទប់របស់ពួកគេ ។

មន្ត្រីសណ្តាប់ធ្នាប់សាធារណៈលោក Heru Triwijanarko បានប្រាប់ AFP ថា “ការអនុវត្តច្បាប់ឥស្លាម Syariah គឺមិនថាវាជានរណាទេ ហើយសូម្បីតែភ្ញៀវទេសចរក៏ត្រូវគោរពបទដ្ឋានក្នុងស្រុកដែរ” ។

គួរបញ្ជាក់ថា ការរួមភេទភេទដូចគ្នាមិនខុសច្បាប់នោះទេនៅកន្លែងផ្សេងទៀតនៅក្នុងប្រទេសឥណ្ឌូនេស៊ី ហើយខេត្ត Aceh គឺជាតំបន់តែមួយគត់នៅក្នុងប្រទេសមូស្លីមធំបំផុតរបស់ពិភពលោកដែលបានដាក់ចេញច្បាប់ Syariah ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ បណ្ដុំរូបភាពកំសត់ៗក្រុមគ្រួសារជនរងគ្រោះនៃការធ្លាក់យន្តហោះឥណ្ឌូនេស៊ីធ្វើពិធីរំឭកវិញ្ញាណក្ខន្ធនៅសមុទ្រ

ចុចអាន ៖ កូវីដ ១៩ សម្លាប់បុគ្គលិកសុខាភិបាលឥណ្ឌូនេស៊ី ៦៤៧ នាក់