ត្រឹមជាង ៤ ម៉ោង កូរ៉េខាងជើង ជួបគ្រោះរញ្ជួយដី ២ លើកនៅជិតទីតាំង​សាកល្បងនុយក្លេអ៊ែរ

ទីភ្នាក់ងារអាកាសធាតុជាតិរបស់កូរ៉េខាងត្បូងបាននិយាយថា គ្រោះរញ្ជួយដីតិចតួចចំនួន ២ បានវាយប្រហារនៅជិតទីតាំងសាកល្បងនុយក្លេអ៊ែររបស់ប្រទេសកូរ៉េខាងជើងកាលពីថ្ងៃអាទិត្យ ហើយក៏ជាគ្រោះរញ្ជួយដីដែលបានវាយប្រហារជាបន្តបន្ទាប់មកលើតំបន់ក្នុងរយៈពេលប៉ុន្មានខែថ្មីៗនេះ ។

ការរញ្ជួយដីលើកទីមួយដែលមានកម្រិត ២.៧ រ៉ិចទ័រ បានកើតឡើងប្រហែល ៤០ គីឡូម៉ែត្រខាងជើងនៃតំបន់ Kilju ខេត្ត North Hamgyong វេលាម៉ោង ៣ និង ១៣ នាទីទៀបភ្លឺ ខណៈលើកទី ២ កើតឡើងនៅម៉ោង ៧ និង ៥៥ នាទីព្រឹក មានកម្រិត ២.៣ រ៉ិចទ័រ និងបានវាយប្រហារនៅចម្ងាយ ៤២ គីឡូម៉ែត្រនៃទីតាំងដដែល ។

ចំណែកចំណុចកណ្តាលនៃការរញ្ជួយដីលើកទីមួយគឺនៅរយៈទទឹង ៤១.៣ ដឺក្រេ និងរយៈបណ្តោយ ១២៩.១៩ ដឺក្រេក្នុងជម្រៅ ១៥ គីឡូម៉ែត្រ ខណៈចំណុចកណ្តាលនៃការរញ្ជួយទីពីរស្ថិតនៅរយៈទទឹង ៤១.៣១ ដឺក្រេ និងបណ្តោយ ១២៩.១៦ ដឺក្រេ និងនៅជម្រៅ ៥ គីឡូម៉ែត្រ ។

គួរបញ្ជាក់ថា តំបន់ Kilju គឺជាទីតាំងនុយក្លេអ៊ែរ Punggye-ri ដែលកូរ៉េខាងជើងបានធ្វើការសាកល្បងនុយក្លេអ៊ែរទាំង ៦ របស់ខ្លួន ខណៈក្នុងឆ្នាំ ២០២២ គ្រោះរញ្ជួយដីចំនួន ៨ លើកត្រូវបានរាយការណ៍វាយប្រហារមកលើតំបន់នេះ ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ មកដឹងមូលហេតុដែលលោក Wang Yi ទាញក្រវាត់ ក លែងពាក់ ពេលជួប រដ្ឋមន្ត្រីការបរទេស សិង្ហបុរី