Tesla ដាក់លក់រថយន្តម៉ូដែល X និង S ដែលមានតម្លៃទាបសម្រាប់នៅ អាមេរិក

ក្រុមហ៊ុន Tesla បានដាក់លក់រថយន្តម៉ូដែល S Sedan និង Model X SUV ដែលមានតម្លៃថោកជាងមុន ជាមួយនឹងរយៈពេលកំណត់ក្នុងការបើកបរនៅសហរដ្ឋអាមេរិក ដើម្បីបង្កើនការលក់ ខណៈដែលតម្រូវការសម្រាប់រថយន្តអគ្គិសនីថ្លៃៗត្រូវបានរារាំង ដោយសារតែថ្លៃចំណាយកើនឡើងខ្ពស់ ។

ម៉ូដែល S Sedan មានតម្លៃ ៧៨,៤៩០ ដុល្លារ អាចបើកបានចម្ងាយ ៥១៥ គីឡូម៉ែត្រ ខណៈសម្រាប់ម៉ូដែល X SUV មានតម្លៃ ៨៨,៤៩០ ដុល្លារ អាចបើកបានចម្ងាយរហូតដល់ជាង ៦៥១ គីឡូម៉ែត្រ ។

បច្ចុប្បន្នរថយន្តដែលមានតម្លៃទាប គឺជាផ្នែកមួយនៃការជំរុញទីផ្សាររបស់ក្រុមហ៊ុន Tesla ផ្តោតលើការប្រកួតប្រជែងលើតម្លៃ ស្របពេលដែលក្រុមហ៊ុនផលិតរថយន្តនៅជុំវិញពិភពលោកក៏ចាប់ផ្តើមបង្កើនការនាំចេញរថយន្តអគ្គិសនី ជាហេតុឲ្យនាំការប្រកួតប្រជែងកាន់តែក្តៅគគុក ។

ដោយឡែក កាលពីថ្ងៃអាទិត្យ ក្រុមហ៊ុនបានកាត់បន្ថយ​តម្លៃការលក់រថយន្តសម្រាប់ម៉ូដែល Y និងម៉ូដែល 3 នៅទីផ្សារប្រទេសចិន ។

គួរឲ្យដឹងថា រថយន្តម៉ូដែល S និង X ជាម៉ូដែលចំណាស់ជាងគេបំផុតរបស់ក្រុមហ៊ុន Tesla ហើយការធ្លាក់ចុះតម្លៃអាចជាការប៉ុនប៉ងដើម្បីដកដង្ហើមជីវិតជាថ្មី ខណៈដែលអ្នកវិនិយោគកំពុងរង់ចាំការផលិតដ៏ធំនៃរថយន្ត Cybertruck របស់ក្រុមហ៊ុននៅឆ្នាំក្រោយ ៕

ប្រែសម្រួល៖ នាង រតនៈ

ប្រភព៖​ CNA