ម៉ាឡេស៊ី​ ស៊ើបអង្កេត​រកមូលហេតុ​ ធ្លាក់​យន្តហោះ​ស្លាប់មនុស្ស​១០​នាក់​

នៅថ្ងៃសុក្រទី១៨ខែសីហា ក្រុមអ្នកស៊ើបអង្កេត កំពុងធ្វើការវិភាគឧបករណ៍ថតសំឡេងកាប៊ីនយន្តហោះ (CVR) នៃយន្តហោះធុនស្រាលម៉ាឡេស៊ី ដែលបានធ្លាក់ក្នុងរដ្ឋ Selangor ដោយសម្លាប់មនុស្សទាំង៨នាក់លើយន្តហោះ និងមនុស្ស២នាក់នៅលើដី។

វីដេអូឃ្លីបពីកន្លែងកើតហេតុ បានបង្ហាញឲ្យឃើញនូវ យន្តហោះ Beechcraft Model 390 ផ្ទុះឆេះជាដុំភ្លើង ពេលដែលវាធ្លាក់នៅភាគខាងលិចរាជធានី គូឡាឡាំពួរ។

រដ្ឋមន្ត្រីដឹកជញ្ជូនលោក Anthony Loke បាននិយាយថា CVR ដែលត្រូវបានរកឃើញកាលពីយប់ថ្ងៃព្រហស្បតិ៍ កំពុងត្រូវបានវិភាគ ហើយឧប្បត្តិហេតុនេះ នឹងត្រូវបានស៊ើបអង្កេត។

CVR គឺជាឧបរណ៍កត់ត្រានូវអ្វីដែលកើតឡើងក្នុងកាប៊ីនយន្ដហោះ រួមទាំងការសន្ទនាចុងក្រោយរបស់អ្នកបើក និងសំឡេងផ្សេងទៀតផងដែរ។

លោកប្រាប់អ្នកសារព័ត៌មានថា “ខ្ញុំបានណែនាំឲ្យពន្លឿនការស៊ើបអង្កេត និងធ្វើការឲ្យបានហ្មត់ចត់។ យើងនឹងបង្ហាញលទ្ធផលជាសាធារណៈ ឲ្យបានឆាប់តាមដែលអាចធ្វើទៅបាន”។

ស្របពេលជាមួយគ្នានោះ មេប៉ូលិសម៉ាឡេស៊ី លោក Razarudin Husain បានគូសបញ្ជាក់ថា ដូចជាយន្តហោះខ្នាតតូចដទៃទៀតដែរ យន្តហោះនេះគឺត្រូវបានបំពាក់ដោយតែ CVR ប៉ុណ្ណោះ ពោលគឺមិនមានឧបករណ៍កត់ត្រាទិន្នន័យហោះហើរនោះទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ ពាក្យចុងក្រោយដែលអាកាសយានិកម៉ាឡេស៊ី និយាយទៅកាន់ម្តាយ៖ ខ្ញុំស្រឡាញ់ម៉ាក់!