ចិននឹងពង្រីកកិច្ចសហប្រតិបត្តិការជាមួយថៃលើវិស័យជាច្រើន

នៅថ្ងៃទី២០ ខែសីហា ឆ្នាំ២០២៣ រដ្ឋមន្ត្រីការបរទេសចិនលោក វ៉ាង យី បានជួបជាមួយលោក ដន ប្រាម៉ាត់វិណៃ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃ ក្នុងដំណើរទស្សនកិច្ចទៅកាន់ទីក្រុងប៉េកាំង។

លោក វ៉ាង យី បាននិយាយថា ការអភិវឌ្ឍទំនាក់ទំនងទ្វេភាគីនឹងមិនប៉ះពាល់ដល់ការផ្លាស់ប្តូរស្ថានការណ៍អន្តរជាតិ ឬស្ថានការណ៍ផ្ទៃក្នុងប្រទេសថៃឡើយ ព្រមទាំងបង្ហាញទំនុកចិត្តថា ប្រទេសថៃនឹងនៅតែរក្សាស្ថិរភាព និងការអភិវឌ្ឍប្រកបដោយចីរភាព។ លោកថា ប្រទេសចិនបានត្រៀមខ្លួនរួចជាស្រេចក្នុងការជំរុញកិច្ចសហប្រតិបត្តិការលើវិស័យជាច្រើនជាមួយប្រទេសថៃឱ្យកាន់តែស៊ីជម្រៅថែមទៀត គាំទ្រការពន្លឿនការសាងសង់ផ្លូវដែក (ចិន-ថៃ) និងផ្លូវតភ្ជាប់ផ្លូវដែករវាង (ចិន-ឡាវ-ថៃ) និងកិច្ចខិតខំប្រឹងប្រែងរួមគ្នាដើម្បីបង្ក្រាបសកម្មភាពឧក្រិដ្ឋកម្មឆ្លងដែន ដែលរួមបញ្ចូលទាំងការឆបោកតាមអ៊ីនធឺណិតផងដែរ។

ជាមួយគ្នានេះ លោក វ៉ាង យី ក៏បានលើកឡើងផងដែរ អំពីការត្រៀមខ្លួនរបស់ចិនក្នុងការគាំទ្រការកសាងសហគមន៍អាស៊ាន គាំទ្រអព្យាក្រឹតរបស់អាស៊ាន និងបន្តគាំទ្រកិច្ចខិតខំប្រឹងប្រែងរួមគ្នាដើម្បីកសាងមជ្ឈមណ្ឌលនៃកំណើនសេដ្ឋកិច្ច។

ចំណែកលោក ដន ប្រាម៉ាត់វិណៃ បាននិយាយថា ប្រទេសថៃស្វាគមន៍ក្នុងការពង្រឹងកិច្ចសន្ទនា និងការផ្លាស់ប្តូរជាមួយប្រទេសចិន ជំរុញកិច្ចសហប្រតិបត្តិការដែលជាផលប្រយោជន៍ទៅវិញទៅមកក្នុងវិស័យផ្សេងៗឱ្យកាន់តែស៊ីជម្រៅថែមទៀត និងគាំទ្រការតភ្ជាប់ផ្លូវដែករវាង (ចិន-ឡាវ-ថៃ) និងធ្វើការដើម្បីការអភិវឌ្ឍរួមគ្នា ស្ថិតក្រោមស្ថានការណ៍អន្តរជាតិដែលកំពុងកើនឡើង និងភាពមិនប្រាកដប្រជាក្នុងតំបន់នាពេលបច្ចុប្បន្ន៕

ប្រែសម្រួល៖ គង់ សំអាន

ប្រភព៖ naewna

ចុចអាន៖ ប្រជាជន ថៃ ស្រលាញ់ពេញចិត្តកូនស្រីលោក ថាក់ស៊ីន ធ្វើជានាយករដ្ឋ​មន្ត្រី