លោក គីម ជុងអ៊ុន បញ្ជាឲ្យកងទ័ពកូរ៉េខាងជើង ត្រៀមធ្វើសង្គ្រាមជាមួយ អាមេរិក

មេដឹកនាំកូរ៉េខាងជើងលោក គីម ជុងអ៊ុន បានបញ្ជាឲ្យយោធារបស់លោក ត្រៀមខ្លួនជានិច្ចសម្រាប់ការប្រយុទ្ធ ដើម្បីរារាំងផែនការរបស់បច្ចាមិត្តដែលចង់ឈ្លានពានប្រទេសរបស់លោក។ នេះបើតាមសេចក្តីរាយការណ៍របស់ប្រព័ន្ធផ្សព្វផ្សាយរដ្ឋ កាលពីថ្ងៃអង្គារទី២៩ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងនេះកើតឡើង ចំពេលសហរដ្ឋអាមេរិក កូរ៉េខាងត្បូង និងជប៉ុន ធ្វើសមយុទ្ធកងទ័ពជើងទឹកត្រីភាគី ដើម្បីកំញើញដល់ការគំរាមកំហែងនុយក្លេអ៊ែរពីសំណាក់កូរ៉េខាងជើង។

កូរ៉េ​ខាង​ជើង​ ចាត់ទុកលំហាត់​​បែប​នេះ ​ថា​ជា​ការ​ហាត់​សម​ដើម្បី​លុកលុយ ថ្វីបើទី​ក្រុង​វ៉ាស៊ីនតោន​ និង​ដៃគូ​របស់​ខ្លួន អះអាងថា សមយុទ្ធនេះគឺជាការការពារខ្លួនក៏ដោយ។

លោក គីម និយាយនៅក្នុងសុន្ទរកថាដែលប្រារព្ធទិវាកងទ័ពជើងទឹករបស់ប្រទេសកាលពីដើមសប្តាហ៍នេះថា ដែនទឹកនៅឧបទ្វីបកូរ៉េមិនមានស្ថិរភាពឡើយ ជាមួយនឹងគ្រោះថ្នាក់នៃសង្គ្រាមនុយក្លេអ៊ែរ ដោយសារតែអរិភាពដឹកនាំដោយសហរដ្ឋអាមេរិក។

លើសពីនេះ លោកបានចោទអាមេរិក ថាកំពុងធ្វើសមយុទ្ធកងទ័ពជើងទឹកដ៏ឆ្កួតលីលា ជាមួយសម្ព័ន្ធមិត្តរបស់ខ្លួន និងដាក់ពង្រាយទ្រព្យសម្បត្តិយុទ្ធសាស្ត្រ នៅក្នុងដែនទឹកជុំវិញឧបទ្វីបកូរ៉េ។

លោកគីម ក៏បានលើកឡើងពីកិច្ចប្រជុំកំពូលអាមេរិក-កូរ៉េខាងត្បូង-ជប៉ុន នាពេលថ្មីៗនេះផងដែរ ដែលក្នុងជំនួបនោះ ភាគីទាំង៣ បានឈានដល់កិច្ចព្រមព្រៀង ជំរុញកិច្ចសហប្រតិបត្តិការលើវិស័យការពារជាតិ ដើម្បីទប់ទល់នឹងកម្មវិធីនុយក្លេអ៊ែររបស់កូរ៉េខាងជើង។

លោកបន្តថា “ស្ថានភាពដែលកំពុងកើតមានបែបនេះ គឺតម្រូវឲ្យកងទ័ពជើងទឹករបស់យើង ត្រូវខិតខំប្រឹងប្រែង ហើយបង្រួបបង្រួមដើម្បីត្រៀមខ្លួនធ្វើសង្រ្គាម និងរក្សាការប្រុងប្រយ័ត្នជាទីបំផុត ដើម្បីបំបែកឆន្ទៈរបស់បច្ចាមិត្តក្នុងគ្រាមានអាសន្ន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក គីម ជុងអ៊ុន បញ្ជាឲ្យផលិតមីស៊ីលបន្ថែមមុនសមយុទ្ធ កូរ៉េខាងត្បូង-អាមេរិក