លោក គីម ជុងអ៊ុន ហៅថ្នាក់ដឹកនាំអាមេរិក កូរ៉េខាងត្បូង និងជប៉ុន ថា “មេក្រុមជើងកាង”

មិនត្រឹមតែបញ្ជាឲ្យកងទ័ពត្រៀមខ្លួនសម្រាប់ការប្រយុទ្ធ ដើម្បីរារាំងផែនការរបស់បច្ចាមិត្តដែលចង់ឈ្លានពានប្រទេសប៉ុណ្ណោះទេ, មេដឹកនាំកូរ៉េខាងជើងលោក គីម ជុងអ៊ុន ថែមទាំងបានហៅប្រធានាធិបតីអាមេរិក ចូ បៃដិន, ប្រធានាធិបតីកូរ៉េខាងត្បូង Yoon Suk Yeol និងនាយករដ្ឋមន្ត្រីជប៉ុន Fumio Kishida ថាជា “មេក្រុមជើងកាង” ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម បានបោះពាក្យសម្តីបែបនេះ ខណៈសហរដ្ឋអាមេរិក កូរ៉េខាងត្បូង និងជប៉ុន ធ្វើសមយុទ្ធកងទ័ពជើងទឹកត្រីភាគី ដើម្បីកំញើញដល់ការគំរាមកំហែងនុយក្លេអ៊ែរពីសំណាក់កូរ៉េខាងជើង។

កូរ៉េ​ខាង​ជើង​ ចាត់ទុកលំហាត់​​បែប​នេះ ​ថា​ជា​ការ​ហាត់​សម​ដើម្បី​លុកលុយ ថ្វីបើទី​ក្រុង​វ៉ាស៊ីនតោន​ និង​ដៃគូ​របស់​ខ្លួន អះអាងថា សមយុទ្ធនេះគឺជាការការពារខ្លួនក៏ដោយ។

ក្នុងសុន្ទរកថាដែលប្រារព្ធទិវាកងទ័ពជើងទឹកកូរ៉េខាងជើង កាលពីដើមសប្តាហ៍នេះ លោក គីម និយាយថា ដែនទឹកនៅឧបទ្វីបកូរ៉េមិនមានស្ថិរភាពឡើយ ជាមួយនឹងគ្រោះថ្នាក់នៃសង្គ្រាមនុយក្លេអ៊ែរ ដោយសារតែអរិភាពដឹកនាំដោយសហរដ្ឋអាមេរិក។

លើសពីនេះ លោកបានចោទអាមេរិក ថាកំពុងធ្វើសមយុទ្ធកងទ័ពជើងទឹកដ៏ឆ្កួតលីលា ជាមួយសម្ព័ន្ធមិត្តរបស់ខ្លួន និងដាក់ពង្រាយទ្រព្យសម្បត្តិយុទ្ធសាស្ត្រ នៅក្នុងដែនទឹកជុំវិញឧបទ្វីបកូរ៉េផងដែរ ។

ទោះបីជាយ៉ាងណាក៏ដោយ ក្រសួងការបរទេសកូរ៉េខាងត្បូង បានសម្តែងការសោកស្ដាយជាពន់ពេកចំពោះការដែលលោក គីម ប្រើភាសាមិនសមរម្យបែបនេះ ដើម្បីបង្កាច់បង្ខូចមេដឹកនាំកូរ៉េខាងត្បូង សហរដ្ឋអាមេរិក និងជប៉ុន ។

ពាក់ព័ន្ធនឹងបញ្ហានេះដែរ អ្នកនាំពាក្យក្រសួងការបរទេសកូរ៉េខាងត្បូងលោក Lim Soosuk បានប្រាប់អ្នកសារព័ត៌មានថា កូរ៉េខាងជើងត្រូវតែបញ្ឈប់ជាបន្ទាន់នូវទង្វើដែលបង្កើនភាពតានតឹងជាមួយនឹងការគំរាមកំហែង និងការបង្កហេតុដោយឥតប្រុងប្រយ័ត្ន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក គីម ជុងអ៊ុន បញ្ជាឲ្យកងទ័ពកូរ៉េខាងជើង ត្រៀមធ្វើសង្គ្រាមជាមួយ អាមេរិក