អ៊ុយក្រែន ថា សង្គ្រាមលោកលើកទី៣ ចាប់ផ្តើមរួចទៅហើយ

ប្រធានក្រុមប្រឹក្សាសន្តិសុខ និងការពារជាតិអ៊ុយក្រែនអះអាងថា សង្រ្គាមលោកលើកទីបី បានចាប់ផ្តើមរួចទៅហើយ ខណៈជម្លោះរវាងទីក្រុងមូស្គូនិងទីក្រុងកៀវ កំពុងអូសទាញប្រទេសនៅឆ្ងាយពីតំបន់ ឲ្យមកចូលរួមដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកាសន្តិសុខទីក្រុងកៀវ កាលពីថ្ងៃពុធទី៦ខែកញ្ញា លោក Aleksey Danilov អះអាងថា “អង្គការណាតូ ត្រូវការអ៊ុយក្រែនជាសមាជិក ព្រោះភាពចលាចលជាសកលនឹងបន្ត។  ប្រសិនបើនរណាម្នាក់គិតថាសង្គ្រាមលោកលើកទី៣មិនទាន់ចាប់ផ្តើមទេនោះ វាគឺជាកំហុសដ៏ធំមួយ។ វាចាប់ផ្តើមរួចទៅហើយ ហើយ​ឥឡូវ ​បាន​ចូល​ដល់​ដំណាក់កាលដ៏​សកម្ម​មួយ”។

អង្គុយលើឆាកក្បែរអតីតអគ្គនាយក CIA ឈ្មោះ David Petraeus, លោក Danilov និយាយថា “ប្រសិនបើនរណាម្នាក់គិតថា ជម្លោះនៅអ៊ុយក្រែនគឺជាជម្លោះជម្រះបញ្ជីគ្នារវាងទីក្រុងកៀវ និងមូស្គូនោះ វាគឺជាកំហុសមួយ អ្វីៗគឺស្មុគស្មាញជាងហ្នឹងទៅទៀត”។

ដោយឡែក ក្រសួងការពារជាតិរុស្ស៊ីបានរាយការណ៍កាលពីថ្ងៃពុធទី៦ខែកញ្ញាថា ក្នុងអំឡុងពេលបីខែនៃការវាយលុករបស់អ៊ុយក្រែន រដ្ឋាភិបាលរបស់លោក ហ្សេលេនស្គី បានបាត់បង់ទាហានប្រហែល៦៦០០០នាក់ និងអាវុធធុនធ្ងន់ចំនួន៧៦០០គ្រឿង ទាំងមិនអាចទទួលបានលទ្ធផលសំខាន់អ្វីសោះ។

ទោះបីជាយ៉ាងណាក៏ដោយ រហូតមកដល់ពេលនេះ ទីក្រុងកៀវ បានអះអាងដណ្តើមយកភូមិតូចៗជាច្រើន ប៉ុន្តែភូមិទាំងនោះនៅឆ្ងាយពីបន្ទាយធំៗរបស់រុស្ស៊ី។

ទីក្រុងមូស្គូបាននិយាយជាច្រើនខែមកហើយថា ការប្រយុទ្ធគ្នានៅអ៊ុយក្រែនគឺជាសង្រ្គាមប្រូកស៊ី ដែលធ្វើដោយសហរដ្ឋអាមេរិក និងសម្ព័ន្ធមិត្តណាតូប្រឆាំងរុស្ស៊ី។ រុស្ស៊ីបានព្រមានថា ជំនួយសព្វាវុធ និងការហ្វឹកហ្វឺនដល់កងទ័ពរបស់ទីក្រុងកៀវ និងការចែករំលែកព័ត៌មានសម្ងាត់ មានន័យថា ប្រទេសលោកខាងលិចគឺជាភាគីពាក់ព័ន្ធក្នុងជម្លោះរួចទៅហើយ៕

ប្រែសម្រួល៖ Vann Vann

ប្រភព៖ RT

ចុចអាន៖ រដ្ឋមន្ត្រីការបរទេសអាមេរិក ទៅជួបលោក Zelensky ដល់ទីក្រុងកៀវ