បក្សភឿថៃ នៅសល់តំណែងទំនេរមួយ ហើយកូនស្រីពៅលោក ថាក់ស៊ីន អាចនឹងឡើងកាន់កាប់

បន្ទាប់ពីការបែងចែកតួនាទីនៅក្នុងជួររដ្ឋាភិបាលថ្មីរួចហើយនោះ គណបក្សភឿថៃនៅសល់តំណែងមួយកំពុងទំនេរនៅឡើយ បន្ទាប់ពីលោក Cholnan Srikaew ប្រកាសលាលែងពីតំណែងជាប្រធានគណបក្សកាលពីពេលថ្មីៗនេះ ។

ពាក់ព័ន្ធនឹងបញ្ហានេះដែរ លោក Prasert Chanthararuangthong អគ្គលេខាធិការរបស់គណបក្សភឿថៃបានឲ្យដឹងថា សមាជិកសភាបក្សភឿថៃកំពុងគាំទ្រលោកស្រី Paetongtarn ឲ្យធ្វើជាប្រធានគណបក្ស ស្របពេលដែលកូនស្រីលោក ថាក់ស៊ីន រូបនេះក៏មិនមានតំណែងក្នុងជួររដ្ឋាភិបាលថ្មីផងដែរ ។

លោក Prasert បាននិយាយថា សមាជិកសភាបក្សជាច្រើនចង់ឲ្យលោកស្រី Paetongtarn ធ្វើជាប្រធានបក្សថ្មី ហើយយើងនឹងមិនមានការជំទាស់ ឬកិច្ចពិភាក្សាណាមួយអំពីលក្ខណៈសម្បត្តិសម្រាប់ការឡើងធ្វើជាមេដឹកនាំថ្មីរបស់លោកស្រីទេ ព្រោះយើងចង់មានកូនស្រីលោក ថាក់ស៊ីន រូបនេះធ្វើជាប្រធានគ្រួសារបក្សភឿថៃ និងជាមេដឹកនាំថ្មីរបស់បក្សតែម្ដង” ។

លោក Prasert ដែលជារដ្ឋមន្ត្រីសេដ្ឋកិច្ច និងសង្គមឌីជីថលថ្មីបាននិយាយកាលពីថ្ងៃពុធថា ក្រុមប្រឹក្សាប្រតិបត្តិបណ្ដោះអាសន្ននឹងជួបប្រជុំគ្នានៅថ្ងៃសុក្រ ទី៨ ខែកញ្ញា ដើម្បីកំណត់កាលបរិច្ឆេទសម្រាប់ការសម្រេចជ្រើសរើសមេបក្ស និងសមាជិកក្រុមប្រឹក្សាភិបាលថ្មី ពោលមិនឲ្យផុតរយៈពេល ៦០ ថ្ងៃឡើយ បន្ទាប់ពីការលាលែងពីប្រធានគណបក្សរបស់លោក Cholnan ។

លោក Cholnan វ័យ ៦២ ឆ្នាំបានប្រកាសលាលែងពីតំណែងជាប្រធានគណបក្សកាលពីថ្ងៃទី៣០ ខែសីហា ដោយសារតែលោកមិនបានគោរពតាមពាក្យសន្យា ខណៈកន្លងមកលោកប្រកាសក្ដែងៗថា គណបក្សភឿថៃនឹងមិនបង្កើតរដ្ឋាភិបាលចម្រុះរួមជាមួយនឹងក្រុមយោធាឡើយ ។

អ្នកនយោបាយជើងចាស់មកពីខេត្ត Nan រូបនេះបានសន្យាក្នុងពេលធ្វើយុទ្ធនាការឃោសនាបោះឆ្នោតសកលថ្ងៃទី ១៤ ឧសភាថា ប្រសិនបើបក្សភឿថៃបង្កើតរដ្ឋាភិបាលចម្រុះជាមួយគណបក្សប៉ាឡាង ប្រាឆារ៉ាត់ នោះលោកនឹងចុះចេញពីតំណែងភ្លាម ។

ប៉ុន្តែជាក់ស្ដែងគណបក្សភឿថៃបានប្រមែប្រមូលគណបក្សចម្រុះចំនួន ១០ ដើម្បីបង្កើតរដ្ឋាភិបាលថ្មី ដែលក្នុងនោះក៏មានគណបក្សភូមិចៃថៃ និងបក្សប៉ាឡាង ប្រាឆារ៉ាត់នេះផងដែរ ដែលសុទ្ធសឹងជាមន្ត្រីជំនិតរបស់អតីតនាយករដ្ឋមន្ត្រីលោក ប្រាយុទ្ធ ចាន់អូចា ។ ទោះជាយ៉ាងណា ក្នុងជួររដ្ឋាភិបាលថ្មីដឹកនាំដោយលោកនាយករដ្ឋមន្ត្រី សេតថា ថាវីស៊ីន, លោក Cholnan ក៏បានតួនាទីជារដ្ឋមន្ត្រីក្រសួងសុខភាពសាធារណៈផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រជាជនថៃគ្រប់រូប អាយុចាប់ពី១៦ឆ្នាំឡើង នឹងទទួលបានម្នាក់ ១ម៉ឺនបាត ត្រឹមថ្ងៃទី១ ខែកុម្ភៈ