យោធាមីយ៉ាន់ម៉ាបណ្ដេញមន្ត្រីរបស់លោកស្រី ស៊ូជី ចេញពីតំណែង ហើយដាក់សមាជិកខ្លួនក្នុងរដ្ឋបាលថ្មី

យោធារបស់ប្រទេសមីយ៉ាន់ម៉ាកាលពីថ្ងៃចន្ទបានប្រកាសបណ្ដេញមន្ត្រីរដ្ឋាភិបាលដែលបានជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី ដោយបានដករដ្ឋមន្រ្តី និងសមាជិកសភាចំនួន ២៤ រូបចេញពីតំណែង ហើយបានតែងតាំងមន្ត្រីជំនួស ១១ រូបនៅក្នុងរដ្ឋបាលថ្មីរបស់ខ្លួន បន្ទាប់ពីដណ្តើមអំណាចបាននៅក្នុងរដ្ឋប្រហារមួយ ។

ការប្រកាសនេះត្រូវបានធ្វើឡើងនៅលើកញ្ចក់ទូរទស្សន៍ Myawadday ដែលគ្រប់គ្រងដោយយោធា និងរាប់បញ្ចូលទាំងការតែងតាំងថ្មីនៅនៅក្នុងតំណែងរដ្ឋមន្ត្រីដូចជា រដ្ឋមន្ត្រីក្រសួងហិរញ្ញវត្ថុ រដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងព័ត៌មាន រដ្ឋមន្ត្រីក្រសួងការបរទេស រដ្ឋមន្ត្រីក្រសួងការពារជាតិ រដ្ឋមន្ត្រីក្រសួងព្រំដែន និងរដ្ឋមន្ត្រីក្រសួងមហាផ្ទៃ ។

យោធាបានដណ្តើមអំណាចកាលពីថ្ងៃចន្ទនៅក្នុងរដ្ឋប្រហារមួយដោយបានឃុំខ្លួនលោកស្រី អ៊ុងសាន ស៊ូជី និងមេដឹកនាំដទៃទៀតនៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់លោកស្រីនៅក្នុងការវាយឆ្មក់នៅពេលព្រឹក ។

កងទ័ពបាននិយាយថា ខ្លួនបានអនុវត្តការឃុំខ្លួនដើម្បីឆ្លើយតបទៅនឹង “ការលួចបន្លំសន្លឹកឆ្នោត” ដោយប្រគល់អំណាចទៅឲ្យមេបញ្ជាការយោធាលោកឧត្តមសេនីយ៍ Min Aung Hlaing និងបានប្រកាសដាក់ប្រទេសក្នុងស្ថានភាពអាសន្នរយៈពេមួយឆ្នាំ ។

ដោយនិយាយសង្ខេបក្នុងកិច្ចប្រជុំរដ្ឋបាលថ្មី យោធាបាននិយាយថា លោក Min Aung Hlaing បានសន្យាថានឹងអនុវត្ត “ប្រព័ន្ធប្រជាធិបតេយ្យពហុបក្សប្រកបដោយការរីកចម្រើន និងប្រកបដោយវិន័យពិតប្រាកដ” ។

ទន្ទឹមនោះលោកបានសន្យាថានឹងមានការបោះឆ្នោតដោយសេរីត្រឹមត្រូវ និងយុត្តិធម៌ ហើយប្រគល់អំណាចដល់គណបក្សឈ្នះឆ្នោត ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ តើរដ្ឋប្រហារលើកនេះអាចបញ្ចប់ជីវិតនយោបាយរបស់លោកស្រី ស៊ូជី ពិតមែនឬទេ?

ចុចអាន ៖ ព្រឹត្តិការណ៍សំខាន់ៗក្នុងប្រទេសមីយ៉ាន់ម៉ា ស្ថិតក្រោមការគ្រប់គ្រងរបស់យោធា