ចំនួនអ្នកស្លាប់ដោយសារគ្រោះរញ្ជួយដីនៅ ម៉ារ៉ុក កើនដល់ ២ពាន់នាក់

ចំនួនអ្នកស្លាប់ក្នុងការរញ្ជួយដីនៅប្រទេសម៉ារ៉ុកបានកើនឡើងដល់ ២,០១២នាក់ ខណៈ ២,០៥៩នាក់ផ្សេងទៀតបានរងរបួស នេះបើតាមកាសែតម៉ារ៉ុក Hespress បានរាយការណ៍​ ដោយ​ដកស្រង់​ទិន្នន័យ​របស់ក្រសួងមហាផ្ទៃ។

យ៉ាងណាមិញ​របាយការណ៍​មុន​នេះ​ទើបតែ​បញ្ជាក់​ផងដែរ​ថា​ មនុស្សចំនួន ១,៣០៥ នាក់បាន​ស្លាប់ និង ១,៨៣២ នាក់ផ្សេង​ទៀត​បានរងរបួស។ ប្រព័ន្ធផ្សព្វផ្សាយបានរាយការណ៍​ថាទៀតថា មានមនុស្សរហូតដល់ ៧២០ នាក់ក្នុងចំណោមអ្នករងរបួស កំពុងស្ថិតក្នុងស្ថានភាពធ្ងន់ធ្ងរនូវឡើយ។

​ដោយឡែក កាលពីថ្ងៃសៅរ៍ ស្តេចនៃប្រទេសម៉ារ៉ុក Mohammed VI ទ្រង់បានប្រកាសកាន់ទុក្ខជាតិរយៈពេលបីថ្ងៃ​បន្ទាប់ពីគ្រោះមហន្តរាយនេះ ដោយ​ទង់ជាតិនឹងត្រូវបង្ហោះ​នៅពាក់កណ្តាល​ តាមអគារ​សាធារណៈ​ទាំងអស់ទូទាំងប្រទេស។

សូមបញ្ជាក់ថា កាល​ពីល្ងាចថ្ងៃសុក្រ គ្រោះរញ្ជួយដីកម្រិត ៦.៩រ៉ិចទ័រ បានវាយប្រហារប្រទេសម៉ារ៉ុក ចម្ងាយ ៧៧ គីឡូម៉ែត្រ (៤៨ ម៉ាយ) ភាគនិរតីនៃទីក្រុង Marrakesh ខណៈកម្លាំងនៃ​ការរញ្ជួយដីដែលបានវាយប្រហារប្រទេសម៉ារ៉ុកគឺស្មើនឹងគ្រាប់បែកនុយក្លេអ៊ែរចំនួន ២៥ គ្រាប់ ទាក់ទងនឹង​បរិមាណសម្ភារៈដែលមាននៅក្នុងគ្រាប់បែកបែបនេះ៕

ប្រែសម្រួល៖ សាង ស្រីល័ក្ខ

ប្រភព៖sputnik

ចុចអាន៖រញ្ជួយដីខ្លាំងក្លា វាយប្រហារប្រទេសម៉ារ៉ុក ស្លាប់មនុស្សជិត ៣០០នាក់