តាំងពីឡើងកាន់តំណែង លោក បៃដិន ទើបធ្វើដំណើរមកអាស៊ីអាគ្នេយ៍តែ ៣ប្រទេសប៉ុណ្ណោះ 

ប្រធានាធិបតីសហរដ្ឋអាមេរិក លោក ចូ បៃដិន បានទៅប្រទេសវៀតណាម ដើម្បីបំពេញទស្សនកិច្ច តបតាមការអញ្ជើញរបស់អគ្គលេខាបក្សកុម្មុយនិស្ត លោក Nguyen Phu Trong។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចនេះ គឺជាការប្រារព្ធខួប១០ឆ្នាំនៃទំនាក់ទំនងភាពជាដៃគូគ្រប់ជ្រុងជ្រោយរវាងវៀតណាម និងសហរដ្ឋអាមេរិក ហើយនេះគឺជាដំណើរទស្សនកិច្ចលើកដំបូងរបស់លោកបៃដិន ទៅកាន់ប្រទេសវៀតណាម ចាប់តាំងពីការឡើងកាន់តំណែងនៅដើមឆ្នាំ២០២១មក។

ប្រធានាធិបតីអាមេរិក បានជួបជាមួយមេដឹកនាំបក្សកុម្មុយនិស្តវៀតណាម លោក Trong និងមេដឹកនាំកំពូលវៀតណាមផ្សេងទៀតនៅទីក្រុងហាណូយ ដើម្បីពិភាក្សាអំពីវិធីធ្វើឲ្យកិច្ចសហប្រតិបត្តិការអាមេរិក-វៀតណាម កាន់តែស៊ីជម្រៅ។

ទោះបីជាយ៉ាងណាក៏ដោយ នេះមិនមែនជាលើកដំបូងឡើយ ដែលលោកបៃដិន ធ្វើដំណើរមកកាន់តំបន់អាស៊ីអាគ្នេយ៍។

នៅថ្ងៃសៅរ៍ទី១២ខែវិច្ឆិកាឆ្នាំ២០២២ លោក បៃដិន​ បានធ្វើដំណើរមកកាន់ប្រទេសកម្ពុជា ដើម្បីចូលរួមកិច្ចប្រជុំកំពូល អាមេរិក-អាស៊ាន និងកិច្ចប្រជុំកំពូលអាស៊ីបូព៌ា។ ក្រោយមក លោកក៏បន្តដំណើរទៅកាន់ប្រទេសឥណ្ឌូណេស៊ី សម្រាប់កិច្ចប្រជុំកំពូល G20 នៅកោះបាលី។

ជំនួបនៅកម្ពុជា បានក្លាយជាកិច្ចប្រជុំអាស៊ានលើកដំបូង ដែលលោក បៃដិន ចូលរួមដោយផ្ទាល់ បន្ទាប់ពីកិច្ចប្រជុំកាលពីឆ្នាំមុន ត្រូវធ្វើឡើងពីចម្ងាយ ដោយសារវិបត្តិជំងឺរាតត្បាតកូវីដ១៩។ 

លោកក៏បានក្លាយជាប្រធានាធិបតីអាមេរិកទីពីរ ដែលមកទស្សនកិច្ចប្រទេសកម្ពុជាផងដែរ បន្ទាប់ពីលោក បារ៉ាក់ អូបាម៉ា ដែលមកកម្ពុជា សម្រាប់កិច្ចប្រជុំអាស៊ាន ក្នុងឆ្នាំ២០១២៕

អត្ថបទ​៖ Vann Vann

ចុចអាន៖ តើប្រធានាធិបតីអាមេរិក រូបណា ធ្វើទស្សនកិច្ចវៀតណាម មុនគេ ចាប់តាំងប្រទេសទាំង២ ភ្ជាប់ចំណងការទូត?