G7 ជំរុញ ចិន ដាក់សម្ពាធរុស្ស៊ី ឲ្យបញ្ឈប់ការវាយលុក អ៊ុយក្រែន

ក្រុមប្រទេស G7 នៅថ្ងៃអង្គារទី១៩ខែកញ្ញា បានអំពាវនាវដល់ ចិន ត្រូវដាក់សម្ពាធលើ រុស្ស៊ី ឲ្យបញ្ឈប់ការវាយលុករបស់ខ្លួននៅក្នុងប្រទេសអ៊ុយក្រែន។ ការអំពាវនាវនេះកើតឡើង បន្ទាប់ពីរដ្ឋមន្ត្រីការបរទេសនៃប្លុកនេះ ជួបប្រជុំគ្នានៅខាងក្រៅមហាសន្និបាតអង្គការសហប្រជាជាតិ និងបានចេញសេចក្តីថ្លែងការណ៍រួមមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍ ដែលចេញដោយជប៉ុន ជាប្រធានក្រសួងការបរទេស G7 បាននិយាយថា សមាជិកទាំងឡាយសង្ឃឹមថា ចិននឹងជំរុញឲ្យរុស្ស៊ី ដកទ័ពភ្លាមៗ ដកទាំងអស់ និងដោយគ្មានលក្ខខណ្ឌចេញពីអ៊ុយក្រែន។

សេចក្តីថ្លែងការណ៍នេះ ក៏ធ្វើឡើងផងដែរ ខណៈអ្នកការទូតកំពូលរបស់ចិន លោក Wang Yi កំពុងបំពេញទស្សនកិច្ចនៅរុស្ស៊ីរយៈពេល៤ថ្ងៃ ដែលក្នុងអំឡុងពេលនោះ ប្រទេសទាំងពីរត្រូវបានគេរំពឹងថា នឹងពង្រឹងទំនាក់ទំនងនយោបាយកាន់តែស៊ីជម្រៅ។

សេចក្តីថ្លែងការណ៍ខាងលើបន្តថា សមាជិក G7 ក៏ស្វាគមន៍ផងដែរ ចំពោះការចូលរួមរបស់ចិននៅក្នុងកិច្ចប្រជុំដែលដឹកនាំដោយអ៊ុយក្រែននៅទីក្រុង Jeddah និងបានលើកទឹកចិត្តបន្ថែមទៀតដល់ទីក្រុងប៉េកាំង ឲ្យគាំទ្រសន្តិភាពដ៏ត្រឹមត្រូវ និងយូរអង្វែង រួមទាំងតាមរយៈការសន្ទនាដោយផ្ទាល់ជាមួយអ៊ុយក្រែនផងដែរ។

ទោះមិនបញ្ចេញឈ្មោះចំៗ តែសេចក្តីថ្លែងការណ៍រួមរបស់ G7 បាននិយាយថា សមាជិករបស់ខ្លួនសូមរំលឹកឡើងវិញ នូវការអំពាវនាវរបស់ពួកគេចំពោះភាគីទីបី ឲ្យបញ្ឈប់ជំនួយណាមួយចំពោះសង្គ្រាមលុកលុយរបស់រុស្ស៊ី បើមិនដូច្នោះទេ នឹងប្រឈមមុខជាមួយផលវិភាគ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន កោះហៅឯកអគ្គរាជទូតជប៉ុន មកតវ៉ា ពាក់ព័ន្ធ សេចក្តីថ្លែងការណ៍នៅ G7