ប្រមុខ UN ព្រមានថា “វិបត្តិអាកាសធាតុកំពុងរុញមនុស្សជាតិឲ្យបើកទ្វារទៅ​កាន់ឋាននារក”

អគ្គលេខាធិការអង្គការសហប្រជាជាតិ (UN) លោក Antonio Guterres បានចេញការព្រមានខ្លាំងៗ អំឡុងកិច្ចប្រជុំកំពូលស្ដីពីវិបត្តិអាកាសធាតុជាមួយមេដឹកនាំពិភពលោកថា “មនុស្សជាតិកំពុងបើកទ្វារទៅកាន់ឋាននរក ដោយសារតែវិបត្តិអាកាសធាតុ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសុន្ទរកថាបើកកិច្ចប្រជុំដែលរៀបចំឡើងនៅទីស្នាក់ការកណ្ដាលរបស់អង្គការសហប្រជាជាតិក្នុងទីក្រុងញូវយ៉ក លោក Guterres បានលើកឡើងថា “កម្ដៅកំពុងជះឥទ្ធិពលដ៏គួរឲ្យភ័យខ្លាច ជាពិសេសភ្លើងឆេះដ៏មហន្តរាយមិនធ្លាប់មានក្នុងឆ្នាំ ២០២៣ នេះ” ។

ប្រមុខ UN រូបនេះបញ្ជាក់ថា ទោះបីជាមានការកើនឡើងនូវព្រឹត្តិការណ៍អាកាសធាតុក្ដៅខ្លាំងបំបែកកំណត់ត្រាពិភពលោកក៏ដោយ ប៉ុន្តែការបំភាយឧស្ម័នផ្ទះកញ្ចក់នៅតែបន្តកើនឡើង ហើយឥន្ធនៈហ្វូស៊ីលនៅតែត្រូវបានឧបត្ថម្ភធនរហូតដល់ ៧ ពាន់ពាន់លានដុល្លារជារៀងរាល់ឆ្នាំ ។

លោក Guterres បានសង្កត់ធ្ងន់ថា “ទោះយ៉ាងណា យើងនៅតែអាចកំណត់ការកើនឡើងនៃសីតុណ្ហភាពពិភពលោកដល់ ១.៥ អង្សាសេ ជាពិសេសការដាក់ចេញគោលដៅដើម្បីបញ្ចៀសគ្រោះមហន្តរាយអាកាសធាតុរយៈពេលវែង” ។

ជាចុងក្រោយ លោក Guterres ក៏បានស្នើឲ្យប្រទេសនានាប្តេជ្ញាចិត្តក្នុងការកំណត់ពេលវេលាដើម្បីបញ្ចប់ការបញ្ចេញឥន្ធនៈហ្វូស៊ីល ក៏ដូចជាការបង្កើនហិរញ្ញវត្ថុសំខាន់ៗដើម្បីជួយប្រទេសដែលមានចំណូលទាប និងមធ្យម ឈានទៅរកថាមពលស្អាតឲ្យបានឆាប់រហ័ស ជាពិសេសការវិនិយោគលើវិធានការទប់ទល់នឹងអាកាសធាតុកុំឲ្យវាកាន់តែធ្ងន់ធ្ងរឡើងៗ ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ មេដឹកនាំប្រទេសមហាអំណាច ៤ រូបសុទ្ធតែបាត់មុខពីកិច្ចប្រជុំមហាសន្និ​បាតអង្គការសហប្រជាជាតិ