នាយករដ្ឋមន្ត្រី ថៃ ជួបពិភាក្សាពីឱកាសវិនិយោគជាមួយមហាសេដ្ឋី Elon Musk

លោក សេតថា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុថៃ បានជួបពិភាក្សាស្ដីពីឱកាសវិនិយោគជាមួយលោក Elon Musk នាយកប្រតិបត្តិរបស់ក្រុមហ៊ុន Tesla, SpaceX និង Starlink តាមរយៈកិច្ចប្រជុំតាមប្រព័ន្ធវីដេអូខល ។

ក្នុងជំនួបនោះ លោកនាយក​រដ្ឋមន្ត្រី​ សេតថា បានបង្ហាញការ​ចាប់អារម្មណ៍​ចំពោះ​ការពិភាក្សា​ ជាពិសេសលើទស្សនៈដែលភាគីទាំងពីរបានឯកភាពគ្នា កោតសរសើរចំពោះវឌ្ឍនភាពចង់ធ្វើដើម្បីមនុស្សជាតិ និងដើម្បីពិភពលោកស្អាត ឆ្ពោះទៅអនាគតកាន់តែល្អប្រសើរ ។

ទន្ទឹមនោះ លោក សេតថា ​មាន​ទំនុក​ចិត្ត​ថា​ នឹង​ទទួល​បាន​ជោគជ័យ ទាំងកិច្ចសហប្រតិបត្តិការលើរថយន្តអគ្គិសនី (EV) និងបង្កើនកិច្ចសហប្រតិបត្តិការស្រាវជ្រាវ Space Exploration ដែលមានតម្លៃទីផ្សារខ្ពស់ និងមានជំនឿថា ការជួបពិភាក្សានេះ នឹងមានអត្ថប្រយោជន៍ មិនមែនត្រឹមតែប្រទេសថៃប៉ុណ្ណោះទេ ប៉ុន្តែក៏នឹងមានអត្ថប្រយោជន៍ដល់ពិភពលោកផងដែរ ។

ចំណែកភាគីក្រុមហ៊ុន Tesla ក៏បានថ្លែងកោតសរសើរពីសក្តានុពលធនធានមនុស្សរបស់ប្រទេសថៃ ដែលសមស្របសម្រាប់ការវិនិយោគរបស់ក្រុមហ៊ុន Tesla ខណៈលោក សេតថា បានឆ្លើយតបថា រដ្ឋាភិបាលថៃ និងស្ថាប័នពាក់ព័ន្ធបានត្រៀមខ្លួនរួចជាស្រេចក្នុងការផ្តល់ការគាំទ្រតាមផ្លូវច្បាប់ និងអត្ថប្រយោជន៍ក្នុងការវិនិយោគមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ នាយករដ្ឋមន្ត្រីថៃ បង្ហើបផ្តល់តំណែងមួយ ក្នុងជួររដ្ឋាភិបាលឲ្យលោក ថាក់ស៊ីន ពេលចេញពីពន្ធនាគារ