រុស្ស៊ី ព្រមានថា ណាតូ នឹងបង្កជម្លោះ ដែលអាក្រក់ជាង សង្គ្រាមលោកលើកទី២ទៅទៀត 

លោកខាងលិច កំពុងជំរុញពិភពលោកឲ្យខិតទៅជិតជម្លោះសកល ដែលមិនធ្លាប់ឃើញសោះ ចាប់តាំងពីសង្គ្រាមលោកលើកទី២មក ដោយសារការផ្គត់ផ្គង់អាវុធធុនធ្ងន់ដល់អ៊ុយក្រែន និងការអបអរបែបណាស៊ី។ នេះបើតាមការព្រមានពី អតីតប្រធានាធិបតីរុស្ស៊ីលោក Dmitry Medvedev នៅក្នុងសារ Telegram កាលពីថ្ងៃអង្គារទី២៦ខែកញ្ញា។

លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី បានប្រតិកម្មបែបនេះចំពោះការដែលអ៊ុយក្រែន ទទួលបានរថក្រោះប្រយុទ្ធ M1 Abrams ដែលផលិតដោយសហរដ្ឋអាមេរិក និងរឿងអាស្រូវដែលសភាកាណាដា រួមជាមួយនាយករដ្ឋមន្ត្រី Justin Trudeau និងប្រធានាធិបតីអ៊ុយក្រែន លោក Vladimir Zelensky អបអរដល់អតីតសមាជិកក្រុម Waffen SS។

ស្របពេលមាន​របាយការណ៍​ដែល​ថា ទី​ក្រុង​វ៉ាស៊ីនតោន​បាន​សន្យា​ផ្តល់​ប្រព័ន្ធ​មីស៊ីល​យុទ្ធសាស្ត្រ​រយៈចម្ងាយឆ្ងាយ​ (ATACMS) ដល់ទីក្រុង​កៀវ, លោក​ Medvedev បានអះអាង​ថា “​វា​ហាក់​ដូចជា ​ពួកគេធ្វើឲ្យលែងសល់ជម្រើសអ្វីទៀតហើយ ​ក្រៅពី​ជម្លោះ​ផ្ទាល់​ជាមួយ​ណា​តូ​។ អង្គការនេះ បានប្រែទៅជាប្លុកហ្វាស៊ីសដោយបើកចំហ​ ស្រដៀងទៅនឹងក្រុមរបស់ហ៊ីត្លែរ។ ទោះយ៉ាងណា រុស្ស៊ីនៅតែត្រៀមខ្លួនជាស្រេច ដើម្បីប្រឈមមុខនឹងរឿងនេះ ប្រសិនបើចាំបាច់”។

ទន្ទឹមនោះ លោក​បាន​ព្រមាន​ថា ជម្លោះ​បែប​នេះ ​នឹង​នាំ​ឲ្យ​មាន​ផល​វិបាក​យ៉ាង​មហន្តរាយ​ដល់​មនុស្សជាតិ។ ​លទ្ធផល​នឹង​មាន​ការ​ខាតបង់​ខ្លាំង​សម្រាប់​មនុស្សជាតិ ​ជាង​ឆ្នាំ​១៩៤៥​ទៅទៀត។

អតីតប្រធានាធិបតីរូបនេះ ត្រូវបានគេស្គាល់ច្បាស់ថា ប្រកាន់ជំហរម៉ឺងម៉ាត់ លើទំនាក់ទំនងរបស់រុស្ស៊ីជាមួយលោកខាងលិច ចំពេលមានជម្លោះកំពុងបន្តរវាងទីក្រុងមូស្គូ និងទីក្រុងកៀវ។

កាលពីខែកញ្ញា លោកបានស្នើឲ្យផ្អាកទំនាក់ទំនងការទូតជាមួយសហភាពអឺរ៉ុប ក្រោយប្លុកនេះបានគាំទ្របម្រាមមិនឲ្យជនជាតិរុស្ស៊ី នាំយករថយន្តផ្ទាល់ខ្លួននិងស្មាតហ្វូន ចូលទឹកដីរបស់ពួកគេ ។

ស្របពេលជាមួយគ្នានេះ លោកក៏ធ្លាប់រិះគន់អ្នកគាំទ្រលោកខាងលិចរបស់ទីក្រុងកៀវ ថាជាក្រុមចម្រុះ “គាំទ្រណាស៊ី” ផងដែរ និងព្រមានម្តងហើយម្តងទៀត អំពីការប្រឈមមុខដាក់គ្នាដោយផ្ទាល់រវាងរុស្ស៊ី និងណាតូ។

ទីក្រុងមូស្គូក៏បានព្រមានច្រើនលើកច្រើនសាផងដែរថា ការបន្តផ្គត់ផ្គង់អាវុធរបស់លោកខាងលិចដល់អ៊ុយក្រែន នឹងនាំឲ្យសមាជិកណាតូ លូកដៃកាន់តែជ្រៅចូលទៅក្នុងជម្លោះនិងបង្កហានិភ័យដែលឈានទៅដល់សង្រ្គាមពេញទំហឹងរវាងរុស្ស៊ី និងប្លុកដែលដឹកនាំដោយសហរដ្ឋអាមេរិកមួយនេះ ៕

ប្រែសម្រួល៖ Vann Vann

ប្រភព៖ RT

ចុចអាន៖ ថ្ងៃ ណាតូ ប្រជុំ, រុស្ស៊ី ព្រមានផ្ទុះសង្គ្រាមលោកលើកទី៣