មិនត្រឹមផ្អាកសងបំណុល ថៃ ថែមទាំងអនុញ្ញាតឲ្យកសិករ អាចខ្ចីប្រាក់បន្ថែមដើម្បីរកស៊ី ទៀតផង

នៅថ្ងៃអង្គារទី២៦ខែកញ្ញា គណៈរដ្ឋមន្ត្រីថៃ បានអនុម័តការផ្អាកសងបំណុលរយៈពេលបីឆ្នាំសម្រាប់កសិករ ដែលកម្មវិធីនេះ នឹងធ្វើឲ្យរដ្ឋាភិបាល ចំណាយអស់ប្រាក់ប្រហែល៣០ពាន់លានបាត។

អនុរដ្ឋមន្ត្រីក្រសួងហិរញ្ញវត្ថុ Julapun Amornvivat និយាយថា ដំណាក់កាលទីមួយនៃកម្មវិធីព្យួរបំណុលនេះ នឹងចាប់ផ្តើមនៅថ្ងៃទី១ខែតុលា ហើយដំណើរការរហូតដល់ថ្ងៃទី៣០ខែកញ្ញា ឆ្នាំក្រោយ ដោយដំណាក់នេះ ​នឹង​ត្រូវ​ចំណាយ​ប្រាក់​ប្រហែល​១២​ពាន់​លាន​បាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ សេចក្តីលម្អិតនៃដំណាក់កាលទី២និងទី៣ មិនត្រូវបានបញ្ជាក់ច្បាស់ទេ ព្រោះចាំបាច់ត្រូវទទួលការយល់ព្រមពីគណៈរដ្ឋមន្ត្រីបន្ថែមទៀត។

អ្នកដែលមានសិទ្ធិទទួលបានការផ្អាកសងបំណុលនេះ គឺជាកសិករដែលខ្ចីពីធនាគារកសិកម្ម និងសហករណ៍កសិកម្ម (BAAC) ជាមួយនឹងប្រាក់កម្ចីដើម នៅសល់មិនលើសពី៣០ម៉ឺនបាត គិតត្រឹមថ្ងៃទី៣០ខែកញ្ញាឆ្នាំ។

លោក Julapun និយាយថា កសិករប្រហែល ២.៧លាននាក់ ដែលបូកចូលគ្នាមានបំណុលប្រហែល៣០០ពាន់លានបាត គឺមានសិទ្ធិចូលរួមក្នុងគម្រោងនេះ។ ពួកគេស្មើប្រហែល ៦៤% នៃកូនបំណុលសរុបរបស់ BAAC។

លោក Julapun បន្ថែមថា ពួកគេក៏នឹងត្រូវបានអនុញ្ញាតឲ្យខ្ចីប្រាក់រហូតដល់ ១០ម៉ឺនបាតពីធនាគារ BAAC ដើម្បីរកស៊ីផ្សេងទៀត ក្នុងអំឡុងពេលនៃការព្យួរបំណុលផងដែរ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ប្រកាសអនុវត្តវិធានការ ឲ្យកសិករផ្អាកសងបំណុល នៅចុងឆ្នាំនេះ