កូរ៉េខាងជើង​ ដាក់​គោលនយោបាយ​នុយក្លេអ៊ែរ​ ចូលទៅក្នុង ​រដ្ឋធម្មនុញ្ញ​

រដ្ឋសភាកូរ៉េខាងជើងកាលពីថ្ងៃពុធបានអនុម័តធ្វើវិសោធនកម្មរដ្ឋធម្មនុញ្ញ រួមទាំងគោលនយោបាយកសាងកម្លាំងនុយក្លេអ៊ែររបស់ប្រទេសផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានកណ្តាលកូរ៉េខាងជើង KCNA បានរាយការណ៍កាលពីថ្ងៃពុធទី២៨ខែកញ្ញាថា សភាប្រជាជនកំពូល ដែលជារដ្ឋសភារបស់ប្រទេស បានអនុម័តរបៀបវារៈសំខាន់ៗ​នៃការផ្តល់ឋានៈរដ្ឋនុយក្លេអ៊ែរ និងគោលនយោបាយកម្លាំងនុយក្លេអ៊ែរ ចូលទៅក្នុងរដ្ឋធម្មនុញ្ញ។

ទន្ទឹមនោះ មេដឹកនាំ​កូរ៉េ​ខាង​ជើង លោក គីម ជុងអ៊ុន បានលើកឡើងក្នុង​សម័យ​ប្រជុំសភានោះថា គោលនយោបាយនៃការកសាងកងកម្លាំងនុយក្លេអ៊ែរ បានក្លាយជាផ្នែកមួយនៃច្បាប់មូលដ្ឋានរបស់ប្រទេស។ នេះគឺជាព្រឹត្តិការណ៍ប្រវត្តិសាស្ត្រ ដែលផ្តល់នូវឥទ្ធិពលនយោបាយដ៏រឹងមាំ ដើម្បីបង្កើនសក្តានុពលការពារជាតិយ៉ាងសំខាន់។

ស្របពេលជាមួយគ្នានោះ លោក គីម ជុងអ៊ុន ក៏បានអំពាវនាវឲ្យពន្លឿនការធ្វើទំនើបកម្មអាវុធនុយក្លេអ៊ែរ ដើម្បីរក្សាអត្ថប្រយោជន៍រារាំងជាយុទ្ធសាស្ត្រ ក៏ដូចជាស្នើឲ្យមន្ត្រីទាំងឡាយ ពង្រឹងសាមគ្គីភាពជាមួយបណ្តាប្រទេសដែលប្រឆាំងសហរដ្ឋអាមេរិក និងយុទ្ធសាស្ត្រអនុត្តរភាពលោកខាងលិចផងដែរ។

បន្ថែមពីនេះមេដឹកនាំកូរ៉េខាងជើង ថែមទាំងបានរិះគន់សម្ព័ន្ធភាពត្រីភាគី រវាងសហរដ្ឋអាមេរិក ជប៉ុន និងកូរ៉េខាងត្បូងផងដែរ ថាជាកំណែទម្រង់អាស៊ីរបស់អង្គការណាតូ ខណៈការ​ប្រកាស​នេះ​ ​ធ្វើ​ឡើង​មួយ​ថ្ងៃ​ប៉ុណ្ណោះ បន្ទាប់​ពី​កូរ៉េ​ខាង​ត្បូង​ រៀបចំក្បួន​ព្យុហយាត្រា​យោធា​​ធំ​បំផុត​របស់​ខ្លួន​ក្នុង​រយៈ​ពេល ​១០ ​ឆ្នាំ។

ប្រធានាធិបតីកូរ៉េខាងត្បូងលោក Yoon Suk-yeol បាននិយាយក្នុងព្រឹត្តិការណ៍នេះថា “កូរ៉េខាងជើង ត្រូវតែដឹងឲ្យច្បាស់ថា អាវុធនុយក្លេអ៊ែរនឹងមិនអាចធានាសន្តិសុខរបស់ពួកគេបានទេ។ ប្រសិនបើកូរ៉េខាងជើង ប្រើអាវុធនុយក្លេអ៊ែរមែន ការឆ្លើយតបដ៏លើសលប់ពីសម្ព័ន្ធភាពកូរ៉េខាងត្បូង និងសហរដ្ឋអាមេរិក នឹងបញ្ចប់របបទីក្រងព្យុងយ៉ាង”។

គួរបញ្ជាក់ថា កូរ៉េខាងជើង បានធ្វើការសាកល្បងនុយក្លេអ៊ែរចំនួន ៦ លើកមកហើយ ខណៈដែលខ្លាំងបំផុតនោះគឺក្នុងខែកញ្ញាឆ្នាំ២០១៧ ពោលគឺមានកម្លាំងប្រហែល១០០គីឡូតោន ស្មើនឹងប្រហែល ៥ នៃគ្រាប់បែកបរមាណូ ដែលអាមេរិកទម្លាក់លើទីក្រុងណាហ្គាសាគីរបស់ប្រទេសជប៉ុន ក្នុងឆ្នាំ១៩៤៥៕

ប្រែសម្រួល៖ Vann Vann

ប្រភព៖ VN Express

ចុចអាន៖ កូរ៉េខាងត្បូង បង្អួតសព្វាវុធទ្រង់ទ្រាយធំដ៏កម្រ ពេញក្រុងស៊េអូល ដើម្បីកំញើញ កូរ៉េខាងជើង