នាយករដ្ឋមន្ត្រីថៃ នឹងបរិច្ចាគប្រាក់ខែទាំងអស់ ទៅឲ្យមូលនិធិ ជួយអ្នកខ្វះខាត

អ្នកនាំពាក្យរដ្ឋាភិបាលថៃលោក Chai Wacharonke បាននិយាយនៅថ្ងៃព្រហស្បតិ៍ទី២៨ខែកញ្ញាថា នាយករដ្ឋមន្ត្រី សេដ្ឋា ថាវីស៊ីន បានប្តេជ្ញាបរិច្ចាគប្រាក់ខែរបស់គាត់ទាំងអស់ និងប្រាក់ឧបត្ថម្ភដែលរកបានក្នុងអំឡុងពេលកាន់តំណែង ឲ្យទៅមូលនិធិផ្សេងៗក្នុងប្រទេសថៃ ដោយចាប់ផ្តើមពីមូលនិធិកុមារទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chai និយាយថា នាយករដ្ឋមន្ត្រី មានជំនឿលើអំណាចនៃការបរិច្ចាគ ដោយចាប់ផ្តើមពីខ្លួនគាត់មុនគេ ខណៈរដ្ឋាភិបាលបានចាប់ផ្តើមអនុវត្តគោលនយោបាយរបស់ខ្លួន ដើម្បីបង្កើតឱកាស លើកកម្ពស់សុខុមាលភាពប្រជាជន កាត់បន្ថយវិសមភាពក្នុងសង្គម និងគាំទ្រដល់ការអប់រំកុមារ។

បើបូកចូលគ្នាទាំងប្រាក់ខែជានាយករដ្ឋមន្ត្រី និងជារដ្ឋមន្ត្រីហិរញ្ញវត្ថុ, លោក សេដ្ឋា មានប្រាក់ខែសរុប ១២៥ ៥៩០បាត ហើយប្រាក់ទាំងនេះ នឹងត្រូវបញ្ជូនតាមរយៈមូលនិធិ ដើម្បីជួយអ្នកខ្វះខាត។

អ្នកនាំពាក្យខាងលើនិយាយថា ក្រុមការងារមួយ នឹងត្រូវបានបង្កើតឡើងដើម្បីសម្រេចថាតើ មូលនិធិណា ត្រូវទទួលអំណោយរបស់នាយករដ្ឋមន្ត្រីតាមលំដាប់លំដោយ។ 

ទោះបីជាយ៉ាងណាក៏ដោយ មូលនិធិសម្រាប់កុមារ គឺជាអទិភាពមុនគេ។

យោងតាមអ្នកនាំពាក្យដដែល, ក្រៅពីការបរិច្ចាគ លោកនាយករដ្ឋមន្ត្រី ក៏នឹងព្យាយាមជួបជាមួយមូលនិធិសប្បុរសធម៌ផ្សេងៗ ដើម្បីស្តាប់បញ្ហារបស់ពួកគេ និងស្វែងរកដំណោះស្រាយផងដែរ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ មិនត្រឹមផ្អាកសងបំណុល ថៃ ថែមទាំងអនុញ្ញាតឲ្យកសិករ អាចខ្ចីប្រាក់បន្ថែមដើម្បីរកស៊ី ទៀតផង