រដ្ឋប្រហារមីយ៉ាន់ម៉ាអាចធ្វើឲ្យអាស៊ានជ្រួលច្របល់

អ្នកជំនាញឥណ្ឌូនេស៊ីផ្នែកកិច្ចការអាស៊ីអាគ្នេយ៍បាននិយាយកាលពីថ្ងៃព្រហស្បតិ៍ថា ការធ្វើរដ្ឋប្រហារយោធានៅក្នុងប្រទេសមីយ៉ាន់ម៉ានឹងជះឥទ្ធិពលដល់សន្តិសុខក្នុងតំបន់ជាពិសេសនៅក្នុងបណ្តាប្រទេសជាសមាជិកអាស៊ាន ។

លោក Priyambudi Sulistyanto អ្នកជំនាញផ្នែកកិច្ចការអាស៊ីអាគ្នេយ៍នៅសាកលវិទ្យាល័យ Flinders ក្នុងប្រទេសអូស្ត្រាលីបាននិយាយថា វិបត្តិមីយ៉ាន់ម៉ាអាចធ្វើឲ្យប្លុកនេះជ្រួលច្របល់ ប្រសិនបើសហគមន៍អន្ដរជាតិមិនអើពើ ដោយបន្ថែមថា វាអាចធ្វើឲ្យស្ថានភាពជនភៀសខ្លួនរ៉ូហ៊ីងយ៉ាកាន់តែអាក្រក់ និងបណ្តាលឲ្យប្រជាជនភៀសខ្លួនចេញពីប្រទេសដូចជាវិបត្តិនយោបាយឆ្នាំ ១៩៨៨ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sulistyanto បាននិយាយនៅក្នុងសិក្ខាសាលាតាមអ៊ីនធឺណិតដែលរៀបចំដោយអង្គការក្រៅរដ្ឋាភិបាល Migrant Care ដែលមានមូលដ្ឋាននៅទីក្រុងហ្សាកាតាថា “ បញ្ហាជនជាតិភាគតិចជាពិសេសជនជាតិរ៉ូហ៊ីងយ៉ា ជនជាតិ Kachin និងជនជាតិ Karen មិនបានត្រូវបានដោះស្រាយទេ ។ វាក៏ទទួលបាននូវបញ្ហាដែលមិនត្រូវបានដោះស្រាយក្នុងយុគសម័យរបស់លោកស្រី អ៊ុងសាន ស៊ូជី ផងដែរ” ។

ទន្ទឹមនោះលោកបានសម្តែងក្តីសង្ឃឹមថា អាស៊ាននឹងមានភាពសកម្មក្នុងការដោះស្រាយវិបត្តិ ទោះបីមានការលំបាកក្នុងការឆ្លើយតបនឹងបញ្ហាសិទ្ធិមនុស្សនៅក្នុងតំបន់ដោយសារគោលការណ៍មិនជ្រៀតជ្រែកចូលកិច្ចការផ្ទៃក្នុងរបស់ប្រទេសជាសមាជិកក៏ដោយ ។

លោកបានបន្ថែមថា “សមាជិកអាស៊ានក៏ត្រូវបានបែងចែកតាមរបៀបរបស់ពួកគេដើម្បីឆ្លើយតបទៅនឹងរដ្ឋប្រហារនេះដែរ” ។

ថ្លែងនៅក្នុងកិច្ចពិភាក្សាក្រុមប្រឹក្សានេះ លោកស្រី Rachel Arinii Judhistari អ្នកគ្រប់គ្រងកម្មវិធីវេទិកាអាស៊ីសម្រាប់សិទ្ធិមនុស្ស និងការអភិវឌ្ឍ (FORUM-ASIA) បានកោតសរសើរចំពោះការអំពាវនាវរបស់អាស៊ានចំពោះប្រទេសមីយ៉ាន់ម៉ាឲ្យបន្តការផ្សះផ្សាជាតិ ។

ទោះយ៉ាងណាលោកស្រី Arinii បានជំរុញឲ្យអង្គការក្នុងតំបន់ធ្វើសកម្មភាពជាក់ស្តែងដោយរៀបចំកិច្ចប្រជុំពិសេសជាមួយមេដឹកនាំមីយ៉ាន់ម៉ាដើម្បីពិភាក្សាអំពីវិបត្តិនេះ ។ លោកស្រីបារម្ភថានឹងមានការរំលោភសិទ្ធិមនុស្សយ៉ាងច្រើន បន្ទាប់ពីរដ្ឋប្រហារ ។

លោកស្រី Arinii បានបន្ថែមទៀតថា ប្លុកនេះអាចស្នើសុំឲ្យគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) ធ្វើការស៊ើបអង្កេតអំពីរដ្ឋប្រហារនៅមីយ៉ាន់ម៉ា។

កាលពីថ្ងៃចន្ទលោក Yuyun Wahyuningrum តំណាងឥណ្ឌូណេស៊ីប្រចាំគណៈកម្មការ AICHR បានថ្លែងថា សកម្មភាពយោធារបស់មីយ៉ាន់ម៉ាបានរំលោភគោលការណ៍នៃធម្មនុញ្ញអាស៊ានទាក់ទងនឹងការអនុវត្តអភិបាលកិច្ចរដ្ឋធម្មនុញ្ញ និងធ្វើឲ្យខូចខាតដល់ដំណើរការលទ្ធិប្រជាធិបតេយ្យដែលត្រូវបានអនុវត្តយ៉ាងយកចិត្តទុកដាក់តាំងពីឆ្នាំ ២០១១ នៅក្នុងប្រទេសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ យោធាមីយ៉ាន់ម៉ាបញ្ជាឲ្យសមាជិកសភារបស់លោកស្រី ស៊ូជី ចាកចេញពីទីស្នាក់ការសភា

ចុចអាន ៖ លោក ចូ បៃដិន ទាមទារឲ្យយោធាមីយ៉ាន់ម៉ា លះបង់អំណាច