ពូទីន ជំរុញឱ្យមានការចរចារវាងអ៊ីស្រាអែល អារ៉ាប់ និងអ៊ីរ៉ង់

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រាប់នាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃចន្ទ ទី១៦ ខែតុលា ថា ទីក្រុងមូស្គូចង់ជួយទប់ស្កាត់គ្រោះមហន្តរាយមនុស្សធម៌នៅតំបន់ហ្គាហ្សា និងបានអំពាវនាវឱ្យមេដឹកនាំប្រទេសអ៊ីស្រាអែល អារ៉ាប់ និងអ៊ីរ៉ង់ធ្វើការចរចាគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិមានក្រឹមឡាំងនិយាយថា លោកពូទីនបានបង្ហាញពីឆន្ទៈរបស់រុស្ស៊ីក្នុងការជួយសម្របសម្រួលដើម្បីបញ្ចប់ការប្រឈមមុខដាក់គ្នារវាងប៉ាឡេស្ទីន និងអ៊ីស្រាអែល ព្រមទាំងការសម្រេចបាននូវដំណោះស្រាយដោយសន្តិវិធី តាមរយៈមធ្យោបាយនយោបាយ និងការទូត។

យ៉ាងណាមិញការអំពាវនាវរបស់ ពូទីន មិនបានលើកឡើងអំពីបទឈប់បាញ់ទៅកាន់ក្រុមប្រឹក្សាសន្តិសុខអង្គការសហប្រជាជាតិនោះទេ។ ប៉ុន្តែលោកបានប្រាប់លោក Netanyahu អំពីជំហានដែលរុស្ស៊ីកំពុងធ្វើ ដើម្បីជួយធ្វើឱ្យស្ថានការណ៍មានលក្ខណៈធម្មតា ទប់ស្កាត់ការកើនឡើងនៃអំពើហិង្សា និងទប់ស្កាត់គ្រោះមហន្តរាយមនុស្សធម៌នៅតំបន់ហ្គាហ្សាស្ទ្រីប។

ជាមួយគ្នានោះលោក ពូទីន កំពុងសស្រាក់សស្រាំជួយដោះស្រាយជម្លោះឱ្យកាន់តែឆាប់ ដោយលោកបានសន្ទនាជាមួយមេដឹកនាំនៃប្រទេសអ៊ីរ៉ង់ អេហ្ស៊ីប ស៊ីរី និងអាជ្ញាធរប៉ាឡេស្ទីន ដើម្បីឱ្យប្រទេសដែលពាក់ព័ន្ធជួបចរចាគ្នា។

បន្ថែមពីលើនេះ លោកពូទីនបាននិយាយទៅកាន់ប្រធានាធិបតីស៊ីរីលោក Bashar al-Assad ប្រធានាធិបតីប៉ាឡេស្ទីនលោក Mahmoud Abbas និងប្រធានាធិបតីអេហ្ស៊ីបលោក Abdel Fattah al-Sisi ដើម្បីស្នើសុំជំនួយពី Cairo ក្នុងការជម្លៀសពលរដ្ឋរុស្ស៊ីចេញពីតំបន់ហ្គាហ្សា៕

ប្រែសសម្រួល៖ សន្យា

ប្រភព៖ Reuters

ចុចអាន៖ អ្នកកាសែតប៉ាឡេស្ទីន​ ១២នាក់ ត្រូវបានសម្លាប់ដោយសារការវាយប្រហាររបស់អ៊ីស្រាអែល