អាមេរិក គំរាមសងសឹក បើកងកម្លាំងរបស់ខ្លួននៅមជ្ឈិមបូព៌ា រងការវាយប្រហារ

រដ្ឋមន្ត្រីការបរទេសអាមេរិក លោក Antony Blinken បានគំរាមកាលពីថ្ងៃអាទិត្យទី២២ខែតុលាថា ទីក្រុងវ៉ាស៊ីនតោន បានត្រៀមលក្ខណៈដើម្បីសងសឹក ប្រសិនបើទាហានអាមេរិកត្រូវបានកំណត់គោលដៅ នៅក្នុងព្រឹត្តិការណ៍សង្គ្រាមអ៊ីស្រាអែលនិងក្រុមហាម៉ាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយកម្មវិធី Meet the Press របស់ទូរទស្សន៍ NBC, លោក Blinken និយាយថា គាត់រំពឹងថា សង្រ្គាមនឹងរីករាលដាលតាមរយៈការជាប់ពាក់ព័ន្ធដោយក្រុមតំណាងអ៊ីរ៉ង់។ រដ្ឋបាលរបស់ប្រធានាធិបតីអាមេរិកលោក ចូ បៃដិន ត្រៀមខ្លួនរួចហើយ ដើម្បីឆ្លើយតបប្រសិនបើយោធាអាមេរិកណាម្នាក់ ក្លាយជាគោលដៅនៃអរិភាពបែបនេះ។

លោក Blinken បន្តថា “យើងកំពុងចាត់វិធានការ ដើម្បីធ្វើឲ្យប្រាកដថា យើងអាចការពារប្រជាជនរបស់យើងប្រកបដោយប្រសិទ្ធភាព និងឆ្លើយតបយ៉ាងម៉ឺងម៉ាត់ប្រសិនបើចាំបាច់”។

ស្របពេលជាមួយគ្នានោះ អ្នកការទូតអាមេរិករូបនេះក៏អះអាងផងដែរថា អ៊ីស្រាអែលមិនចង់គ្រប់គ្រងតំបន់ហ្គាហ្សាស្ទ្រីបទេ បន្ទាប់ពីសង្រ្គាមជាមួយក្រុមហាម៉ាស់ដល់ទីបញ្ចប់ ប៉ុន្តែក្រោយ​សង្គ្រាម​ ​ស្ថានភាពមិនអាចវិលត្រលប់ទៅដូចមុនបានឡើយ។

កងទ័ពអ៊ីស្រាអែល បាននិងកំពុងទម្លាក់គ្រាប់បែកលើគោលដៅរបស់ក្រុមហាម៉ាស់ នៅតំបន់ហ្គាហ្សាស្ទ្រីប ចាប់តាំងពីមានការវាយប្រហារបង្ហូរឈាមកាលពីថ្ងៃទី៧ខែតុលា។

នៅចុងសប្តាហ៍ កងកម្លាំងអាកាសអ៊ីស្រាអែល ក៏បានបង្កើនការវាយប្រហាររបស់ខ្លួនម្តងទៀត ដើម្បីរៀបចំសម្រាប់ការវាយលុកដីគោកនៅតំបន់ហ្គាហ្សាផងដែរ ហើយបច្ចុប្បន្ន​ ​គេ​មិន​ទាន់​ដឹងទេ​ថា​តើ ​អ៊ីស្រាអែល​មាន​ផែនការ​អ្វី​ខ្លះ ក្រោយការ​វាយលុក​នោះទេ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ រថក្រោះអ៊ីស្រាអែល ច្រឡំដៃបាញ់ចំប៉ុស្តិ៍យាម ក្នុងទឹកដីអេហ្ស៊ីប