លោក Netanyahu ថា ទាហាន អ៊ីស្រាអែល ចូលទៅតំបន់ហ្គាហ្សាដើម្បីកម្ចាត់​ក្រុមហាម៉ាស់ និងរំដោះចំណាប់ខ្មាំង

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា កងទ័ពអ៊ីស្រាអែលបានចល័តចូលទៅក្នុងតំបន់ហ្គាហ្សាស្ទ្រីប ដើម្បីកម្ចាត់ក្រុមប្រដាប់អាវុធប៉ាឡេស្ទីនហាម៉ាស់ និងរំដោះចំណាប់ខ្មាំងដែលត្រូវបានចាប់ឃុំខ្លួន អំឡុងការវាយប្រហារមកលើប្រទេសអ៊ីស្រាអែលកាលពីថ្ងៃទី៧ ខែតុលា ។

លោកនាយករដ្ឋមន្ត្រីបាននិយាយតាមទូរទស្សន៍ទៅកាន់ប្រជាជាតិថា “ប្រជាពលរដ្ឋអ៊ីស្រាអែល និងកងទ័ពជើងគោករបស់យើងបានឆ្លងកាត់ច្រកព្រំដែនតំបន់ហ្គាហ្សាដើម្បីចូលទៅក្នុងរូងភ្នំលាក់ខ្លួនរបស់ក្រុមហាម៉ាស់ ហើយវាគឺជាសង្រ្គាមដែលមានគោលបំណងច្បាស់លាស់ដើម្បីកម្ចាត់ក្រុមប្រដាប់អាវុធមួយនេះ និងនាំចំណាប់ខ្មាំងត្រឡប់មកវិញផងដែរ” ។

ការអះអាងរបស់លោក Netanyahu កើតមានឡើង បន្ទាប់ពីមានការអនុម័តជាឯកច្ឆ័ន្ទស្ដីអំពីការសម្រេចចិត្ត​ពង្រីក និងប្រកាសបើកប្រតិបត្តិការ​ជើងគោក​នៅ​តំបន់ហ្គាហ្សាស្ទ្រីប​ពីសំណាក់​សមាជិក​គណៈរដ្ឋមន្ត្រី​សង្រ្គាមរបស់ប្រទេស ។

ថ្លែងក្នុងសន្និសីទសារព័ត៌មានរួមមួយជាមួយរដ្ឋមន្ត្រីការពារជាតិលោក Yoav Galant និងរដ្ឋមន្ត្រីសង្គ្រោះបន្ទាន់ Benny Gantz, លោក Netanyahu បានសង្កត់ធ្ងន់ថា “យើង​សម្រេចធ្វើ​ដូច្នេះ ព្រោះយើងមានទំនួលខុសត្រូវចំពោះជោគវាសនារបស់ប្រទេសជាតិ ហើយយើង​ក៏មាន​កាតព្វកិច្ច​ការពារ​ទាហាន​របស់​យើងផងដែរ” ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ៣ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៧,៧០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Netanyahu សម្រេចបើកប្រតិបត្តិការជើងគោកលើតំបន់ហ្គាហ្សា ជាឯកច្ឆ័ន្ទ