កូរ៉េខាងជើងព្រមានថា សម្ព័ន្ធ​យោធា​អាមេរិក ជប៉ុន និង​កូរ៉េ​ខាង​ត្បូង ​អាច​បង្ក​សង្គ្រាម​លោក​លើក​ទី ៣

កាសែត Rodong Sinmun របស់កូរ៉េខាងជើងបានព្រមានថា ការបង្កើតជាផ្លូវការនៃសម្ព័ន្ធភាពយោធាត្រីភាគី រវាងទីក្រុងវ៉ាស៊ីនតោន តូក្យូ និងសេអ៊ូល នឹងបណ្តាលឲ្យភាពតានតឹង នៅឧបទ្វីបកូរ៉េកាន់តែធ្ងន់ធ្ងរឡើង ហើយឈានដល់ការផ្ទុះសង្គ្រាមលោកលើកទី៣ទៀតផង។

កាសែតផ្លូវការរបស់គណៈកម្មាធិការមជ្ឈិម នៃគណបក្សពលករកូរ៉េឧបទ្វីបកូរ៉េ បានព្រមានថា ឧបទ្វីបកូរ៉េ គឺជាចំណុចក្តៅបំផុតមួយនៅលើភពផែនដីរួចទៅហើយ។ នៅភាគខាងជើង និងខាងត្បូងនៃព្រំដែន, មហាអំណាចនុយក្លេអ៊ែរ បានចូលរួមក្នុងការប្រឈមមុខដាក់គ្នាខាងយោធាដ៏កាចសាហាវ ដែលជាផ្កាភ្លើងអាចបង្កឲ្យផ្ទុះឡើងនៃសង្រ្គាមនុយក្លេអ៊ែរ។

កាសែតដដែលគូសបញ្ជាក់ថា ប្រសិនបើការពង្រឹងទំនាក់ទំនងយោធាបន្ថែមទៀតរវាងសហរដ្ឋអាមេរិក ជប៉ុន និងកូរ៉េខាងត្បូង ក្លាយជាសម្ព័ន្ធមិត្តផ្លូវការដែលប្រតិបត្តិការដោយពេញសមត្ថភាពមែននោះ ស្ថានភាពនៅលើឧបទ្វីបកូរ៉េ និងក្នុងតំបន់ នឹងកើនឡើងដល់កម្រិតអតិបរមា។

ការព្រមានចុងក្រោយបង្អស់នេះ កើតឡើងបន្ទាប់ពីទីក្រុងវ៉ាស៊ីនតោន ចូលរួមធ្វើសមយុទ្ធជាបន្តបន្ទាប់និងបង្កភាពតានតឹងនៅលើឧបទ្វីបកូរ៉េ។

មុននេះ អនុរដ្ឋមន្ត្រីការបរទេសកូរ៉េខាងជើង លោក Im Chon-il ក៏បានថ្កោលទោសអង្គការណាតូ និងសម្ព័ន្ធភាពអាស៊ី រវាងសហរដ្ឋអាមេរិក ជប៉ុន និងកូរ៉េខាងត្បូងថា ជា សាច់មហារីក ដែលធ្វើឲ្យសណ្តាប់ធ្នាប់អន្តរជាតិស្ថិតក្នុងគ្រោះថ្នាក់ ផងដែរ។

លោកបានសង្កត់ធ្ងន់នៅក្នុងសេចក្តីថ្លែងការណ៍មួយថា គោលនយោបាយការបរទេសរបស់អាមេរិកបានឆ្លុះបញ្ចាំងពី វិធីបង្កការប្រឈមមុខដាក់គ្នាក្នុងរចនាប័ទ្មសង្រ្គាមត្រជាក់។

ដោយឡែក រដ្ឋមន្ត្រីការពារជាតិកូរ៉េខាងជើង លោក Kang Sun Nam បាននិយាយកាលពីដើមឆ្នាំនេះថា លទ្ធភាពនៃសង្គ្រាមនុយក្លេអ៊ែរនៅលើឧបទ្វីបកូរ៉េគឺលែងជាសំណួរទៀតហើយ ដោយគ្រាន់តែគេមិនច្បាស់ថាតើនរណានឹងចាប់ផ្តើមវា ឬនៅពេលណាប៉ុណ្ណោះ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ រុស្ស៊ី ថា ជម្លោះអ៊ុយក្រែន នឹងបង្កជា សង្រ្គាម​លោក​លើក​ទី​៣ ​ដោយ​សារ មានមនុស្ស​ល្ងីល្ងើ កំពុង​កាន់​តួនាទីធំៗ ​នៅ​លោក​ខាង​លិច