នេប៉ាល់នឹងហាមឲ្យប្រើ TikTok ព្រោះរំខានដល់សុខុមាលភាពសង្គម

ប្រទេសនេប៉ាល់កាលពីថ្ងៃចន្ទ ទី១៣ ខែវិច្ឆិកា បានប្រកាសនឹងហាមឃាត់ការប្រើប្រាស់បណ្ដាញ TikTok ដោយសារតែវាប៉ះពាល់ដល់សុខុមាលភាពសង្គម ។

វេទិកាចែករំលែកវីដេអូដ៏ពេញនិយមដែលមានអ្នកប្រើប្រាស់ប្រចាំខែប្រមាណ ១ ពាន់លាននាក់នេះ បានប្រឈមមុខនឹងការរឹតបន្តឹងនៅក្នុងប្រទេសជាច្រើនសម្រាប់ការបំពានច្បាប់ទិន្នន័យ និងបង្កគ្រោះថ្នាក់ដល់យុវជន ។

ពាក់ព័ន្ធនឹងបញ្ហានេះដែរ អ្នកស្រី Rekha Sharma រដ្ឋមន្ត្រីក្រសួងទំនាក់ទំនង និងបច្ចេកវិទ្យាព័ត៌មាននេប៉ាល់បាននិយាយថា “ការសម្រេចចិត្តហាមឃាត់មិនប្រើប្រាស់បណ្ដាញ TikTok ត្រូវបានធ្វើឡើងភ្លាមៗ ហើយអាជ្ញាធរពាក់ព័ន្ធក៏កំពុងដោះស្រាយបញ្ហាបច្ចេកទេសផងដែរ” ។

អ្នកស្រី Sharma បានបញ្ជាក់ទៀតថា ម្យ៉ាងទៀត ការសម្រេចចិត្តហាមប្រាមនេះកើតមានឡើង ក៏ដោយសារតែ TikTok ត្រូវគេប្រើជាប្រចាំដើម្បីចែករំលែកមាតិកាដែលរំខានដល់សុខុមាលភាពសង្គម រំខានដល់រចនាសម្ព័ន្ធគ្រួសារ និងទំនាក់ទំនងសង្គម ។

សូមបញ្ជាក់ថា ការសម្រេចចិត្តនេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រទេសនេប៉ាល់បានចេញសេចក្ដីណែនាំតម្រូវឲ្យប្រព័ន្ធផ្សព្វផ្សាយសង្គមទាំងអស់ដែលកំពុងប្រតិបត្តិការនៅក្នុងប្រទេស បង្កើតការិយាល័យដើម្បីផ្ដល់ព័ត៌មានពាក់ព័ន្ធទាំងអស់ ៕

ប្រែសម្រួល៖ វារី

ប្រភព៖ vnexpress

ចុចអាន៖ រដ្ឋមួយរបស់ អាមេរិក ប្តឹង TikTok ពីបទមានចេតនាផ្ដល់ផលប៉ះពាល់ដល់កុមារ