UN៖ មន្ទីរពេទ្យហ្គាហ្សា មិនមែនជាសមរភូមិទេ

ប្រធានជំនួយសង្គ្រោះរបស់អង្គការសហប្រជាជាតិ (UN) បាននិយាយនៅថ្ងៃពុធថា លោកពិតជាតក់ស្លុតអំពីរបាយការណ៍នៃការវាយឆ្មក់របស់យោធាអ៊ីស្រាអែលនៅឯមន្ទីរពេទ្យ Al-Shifa ក្នុងទីក្រុងហ្គាហ្សា ដោយសង្កត់ធ្ងន់ថា មន្ទីរពេទ្យមិនមែនជាសមរភូមិប្រយុទ្ធនោះទេ ។

លោក Martin Griffiths អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងអ្នកសម្របសម្រួលសង្គ្រោះបន្ទាន់បានសរសេរនៅលើបណ្ដាញ X ថា ការការពារទារកទើបនឹងកើត អ្នកជំងឺ បុគ្គលិកពេទ្យ និងជនស៊ីវិលទាំងអស់ត្រូវតែជារឿងចម្បង ខណៈការយកមន្ទីរពេទ្យជាកន្លែងប្រតិបត្តិការ ឬវាយប្រហារគ្នា មិនមែនជារឿងត្រឹមត្រូវឡើយ។

កាលពីព្រឹកថ្ងៃពុធ កងទ័ពអ៊ីស្រាអែលបានចាប់ផ្តើមការវាយឆ្មក់មន្ទីរពេទ្យ Al-Shifa ដែលជាមន្ទីរពេទ្យដ៏ធំបំផុតនៅក្នុងតំបន់ហ្គាហ្សាស្ទ្រីប ជាមួយនឹងអ្នកជំងឺចំនួន ៧០០នាក់ និងមនុស្សជាង ២ពាន់នាក់ដែលត្រូវបានផ្លាស់ទីលំនៅ កំពុងស្នាក់នៅខាងក្នុង។

ជុំវិញការវាយឆ្មក់នេះអ៊ីស្រាអែលបានទទួលស្គាល់វា ប៉ុន្តែអះអាងថាខ្លួនធ្វើឡើងដោយសារសមាជិកនៃក្រុមហាម៉ាសកំពុងប្រើប្រាស់មន្ទីរពេទ្យជាមូលដ្ឋាន។

មកទល់ពេលនេះ ការវាយលុករបស់អ៊ីស្រាអែលលើតំបន់ហ្គាហ្សាស្ទ្រីបបានឈានចូលដល់ថ្ងៃទី ៤០ ហើយ ដោយបណ្ដាលឱ្យប្រជាជនប៉ាឡេស្ទីនយ៉ាងហោចណាស់ ១១,៣២០នាក់ត្រូវបានសម្លាប់ រួមទាំងស្ត្រី និងកុមារជាង ៧,៨០០នាក់ និងជាង ២៩,២០០នាក់ផ្សេងទៀតបានរងរបួស។ នេះបើយោងតាមតួលេខចុងក្រោយរបស់អាជ្ញាធរប៉ាឡេស្ទីន៕

ប្រែសម្រួល៖ សន្យា

ប្រភព៖ Anadolu

ចុចអាន៖ ប្រតិបត្តិការបណ្ដើរ អ៊ីស្រាអែលបញ្ជូនសម្ភារជំនួយឱ្យមន្ទីរពេទ្យធំហ្គាហ្សាបណ្ដើរ