ក្នុងមួយម៉ោង មានទារកប៉ាឡេស្ទីន ៥នាក់ស្លាប់និង ៧នាក់កើត ខណៈអ៊ីស្រាអែល ទម្លាក់គ្រាប់បែក មិនដកដៃ

ចាប់តាំងពីថ្ងៃទី៧ ខែតុលាមក ការវាយប្រហាររបស់អ៊ីស្រាអែលលើតំបន់ហ្គាហ្សាស្ទ្រីប បានបណ្តាលឲ្យកុមារជាមធ្យម ៥ នាក់ស្លាប់ក្នុងមួយម៉ោង ខណៈ ៧ នាក់កើត ទាំងដែលអ៊ីស្រាអែល មិនបន្ធូរបន្ថយការទម្លាក់គ្រាប់បែកសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើការវាយប្រហាររបស់អ៊ីស្រាអែលលើតំបន់ហ្គាហ្សាស្ទ្រីបមានកម្រិតខ្លាំងក្លា និងទទួលរងការរិះគន់ពីសំណាក់អន្តរជាតិក៏ដោយ ក៏អ៊ីស្រាអែលនៅតែបន្តដាក់គោលដៅទៅលើមន្ទីរពេទ្យដដែល។

ការវាយប្រហារឥតឈប់ឈររបស់អ៊ីស្រាអែល លើមន្ទីរពេទ្យដូចជា Al-Shifa, Indonesia, Al-Nasr Children’s, Rantisi Children’s, Al-Avde Children’s និង Jerusalem រួមទាំងទីតាំងនៅជុំវិញនោះ បានបណ្តាលឲ្យមានមនុស្សស្លាប់ជាច្រើននាក់។

យោងតាមរដ្ឋាភិបាលហ្គាហ្សា ចាប់តាំងពីថ្ងៃទី៧ខែតុលាមក ការវាយប្រហាររបស់អ៊ីស្រាអែលបានបណ្តាលឲ្យមនុស្ស ១១,៥០០ នាក់ស្លាប់នៅតំបន់ហ្គាហ្សាស្ទ្រីប ក្នុងនោះមានកុមារ ៤,៧១០ នាក់ និងស្ត្រី ៣,១៦០ នាក់ ។ នេះមានន័យថា ជាមធ្យមកុមារ ៥ នាក់បានបាត់បង់ជីវិតរៀងរាល់ម៉ោង ដោយសារការវាយប្រហាររបស់អ៊ីស្រាអែលនៅទីនោះ ។

ទន្ទឹមនោះ នៅក្នុងសេចក្តីថ្លែងការណ៍របស់អង្គការមិនមែនរដ្ឋាភិបាល ដែលមានមូលដ្ឋាននៅចក្រភពអង់គ្លេស Save The Children បានគូសបញ្ជាក់ថា ចំនួនកុមារដែលត្រូវសម្លាប់នៅប៉ាឡេស្ទីន គឺលើសពីកុមារដែលបាត់បង់ជីវិតនៅទូទាំងពិភពលោកដោយសារជម្លោះក្នុងឆ្នាំ ២០២០, ២០២១ និង ២០២២ ទៅទៀត ៕

ប្រែសម្រួល៖ Vann Vann

ប្រភព៖ Anadolu

ចុចអាន៖ តួលេខកុមារស្លាប់នៅហ្គាហ្សា កើនលើស ៤៦០០នាក់ ខណៈជាង៨៦០០នាក់ រងរបួស