ព័ត៌មានអន្ដរជាតិ

អាមេរិក ប្រកាសផ្តល់ជំនួយយោធាឲ្យអ៊ុយក្រែន១០០លានដុល្លារទៀត

បានផុស

១ year មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

ក្រសួងការពារជាតិអាមេរិក បានប្រកាសកាលពីថ្ងៃចន្ទទី២០ខែវិច្ឆិកាថា ប្រធានាធិបតីសហរដ្ឋអាមេរិក លោក ចូ បៃដិន បានអនុម័តកញ្ចប់ជំនួយយោធាថ្មីមួយ សម្រាប់ប្រទេសអ៊ុយក្រែន ដែលមានតម្លៃរហូតដល់ ១០០លានដុល្លារ។

ជំនួយយោធាដែលអាមេរិកផ្តល់ឲ្យអ៊ុយក្រែន (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ចប់ថ្មីនេះរួមមានកាំជ្រួចប្រឆាំងយន្តហោះ Stinger, ប្រព័ន្ធបាញ់កាំភ្លើងធំ HIMARS បូករួមគ្រាប់បន្ថែម, គ្រាប់កាំភ្លើងធំ១៥៥មិល្លីម៉ែត្រនិង១០៥មិល្លីម៉ែត្រ, ប្រព័ន្ធប្រឆាំងរថក្រោះ Javelin និង AT-4 និងគ្រាប់កាំភ្លើងជាង៣លានគ្រាប់ ខណៈកញ្ចប់នេះក៏រួមបញ្ចូលទាំងឧបករណ៍ជម្នះអាកាសធាតុត្រជាក់ គ្រឿងបន្លាស់ និងគ្រឿងយន្តកម្ទេចឧបសគ្គផងដែរ។

ប្រព័ន្ធបាញ់កាំភ្លើងធំ HIMARS (រូបថត៖ Shutterstock)

ការប្រកាសនេះធ្វើឡើង អំឡុងពេលរដ្ឋមន្ត្រីការពារជាតិអាមេរិកលោក Lloyd Austin ធ្វើទស្សនកិច្ចទីក្រុង កៀវ ដោយនៅទីនោះលោកបានជួបជាមួយប្រធានាធិបតី Volodymyr Zelensky។

ក្នុងអំឡុងដំណើរទស្សនកិច្ចនោះ លោក Austin ក៏បានបញ្ជាក់ជាថ្មីទៅលោក Zelensky អំពីការគាំទ្រដ៏ខ្ជាប់ខ្ជួនរបស់សហរដ្ឋអាមេរិកសម្រាប់អ៊ុយក្រែន ផងដែរ។

ប្រធានាធិបតីអ៊ុយក្រែនលោក Volodymyr Zelensky (ឆ្វេង) ចាប់ដៃជាមួយរដ្ឋមន្ត្រីការពារជាតិអាមេរិកលោក Lloyd Austin (រូបថត៖ ការិយាល័យប្រធានាធិបតីអ៊ុយក្រែន)

ហើយនៅចុងសប្តាហ៍នេះ លោក Austin នឹងធ្វើជាម្ចាស់ផ្ទះកិច្ចប្រជុំ ក្រុមទំនាក់ទំនងការពារជាតិអ៊ុយក្រែន ដែលត្រូវបានគេស្គាល់ថាជាកិច្ចប្រជុំកំពូល Ramstein ដើម្បីសម្របសម្រួលជំនួយយោធាបន្ថែមទៀត ដល់ទីក្រុងកៀវ។

គួរបញ្ជាក់ថា គិតត្រឹមពេលនេះ សហរដ្ឋអាមេរិកបានផ្តល់ជំនួយផ្នែកសន្តិសុខអស់ទឹកប្រាក់ជាង៤៤ពាន់លានដុល្លារហើយដល់អ៊ុយក្រែន ចាប់តាំងពីរុស្ស៊ី បើកការវាយលុកនៅក្នុងខែកុម្ភៈឆ្នាំ២០២២៕

ប្រែសម្រួល៖ Vann Vann

ប្រភព៖ Reuters, Kyiv Independent

ចុចអាន៖ លោក ហ្សេលេនស្គី ក្រពុលមុខកាន់តែខ្លាំង រឿងបានគ្រាប់កាំភ្លើងធំតិចទៅៗ តាំងពីសង្គ្រាម អ៊ីស្រាអែល ផ្ទុះឡើង