លោក Netanyahu ប្រកាសបន្តធ្វើសង្គ្រាមជាមួយក្រុមហាម៉ាស ក្រោយបទឈប់បាញ់

លោកនាយករដ្ឋមន្ត្រី Benjamin Netanyahu និយាយថា អ៊ីស្រាអែលនឹងបន្តធ្វើសង្គ្រាមប្រឆាំងក្រុមហាម៉ាស បើទោះបីជាមានបទឈប់បាញ់ជាបណ្តោះអាសន្នជាមួយចលនាសកម្មប្រយុទ្ធឥស្លាមនេះ ដើម្បីដោះលែងចំណាប់ខ្មាំងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីអត្ថាធិប្បាយកាលពីថ្ងៃអង្គារទី២១ខែវិច្ឆិកា មុនការបោះឆ្នោតគណៈរដ្ឋមន្ត្រី លើសំណើបទឈប់បាញ់ លោក Netanyahu បានប្តេជ្ញាថា “ការប្រយុទ្ធនឹងបន្តទៅមុខ។ ​យើង​កំពុង​តែ​មាន​សង្គ្រាម ហើយ​យើង​នឹង​បន្ត​សង្គ្រាមនេះ។ យើងនឹងបន្តរហូតដល់យើងសម្រេចបាននូវគោលដៅទាំងអស់”។

គណៈរដ្ឋមន្ត្រីអ៊ីស្រាអែល ត្រូវបានគេរំពឹងថា នឹងបោះឆ្នោតលើផែនការដែលនឹងផ្អាកការវាយលុករបស់អ៊ីស្រាអែលនៅហ្គាហ្សារយៈពេលច្រើនថ្ងៃ ជាថ្នូរនឹងការដោះលែងចំណាប់ខ្មាំងប្រហែល៥០នាក់ ក្នុងចំណោមចំណាប់ខ្មាំងទាំង២៤០នាក់ ដែលកំពុងស្ថិតនៅក្នុងដៃក្រុមហាម៉ាស។

ស្របពេលជាមួយគ្នានោះដែរ ក្រុមហាម៉ាស ព្យាករថា កិច្ចព្រមព្រៀងដែលសម្របសម្រួលដោយប្រទេសកាតា អាចឈានដល់ក្នុងរយៈពេលដ៏ខ្លីខាងមុខ។

ទោះបីជាយ៉ាងណាក៏ដោយ ព័ត៌មានលម្អិតនៃកិច្ចព្រមព្រៀងណាមួយ មិនត្រូវបានផ្សព្វផ្សាយជាសាធារណៈទេ។

ប៉ុន្តែតាមសារព័ត៌មានអ៊ីស្រាអែល, កិច្ចព្រមព្រៀងមួយ នឹងរួមបញ្ចូលការផ្អាកបាញ់នៅហ្គាហ្សារយៈពេល៥ថ្ងៃ និងការដោះលែងចំណាប់ខ្មាំងចំនួន៥០នាក់ដែលក្រុមហាម៉ាសឃុំខ្លួន ជាថ្នូរនឹងអ្នកទោសប៉ាឡេស្ទីនប្រហែល១៥០នាក់ នៅក្នុងដៃអ៊ីស្រាអែល។

ទូរទស្សន៍ប៉ុស្តិ៍លេខ១២របស់អ៊ីស្រាអែលផ្សាយថា ការដោះលែងចំណាប់ខ្មាំងក្រុមទី១ នឹងធ្វើឡើងនៅថ្ងៃព្រហស្បតិ៍ ឬថ្ងៃសុក្រនេះ៕

ប្រែសម្រួល៖ Vann Vann

ប្រភព៖ PBS

ចុចអាន៖ លោក បៃដិន ថា កិច្ចព្រមព្រៀងដោះលែង ចំណាប់ខ្មាំងជាមួយក្រុមហាម៉ាស ជិតសម្រេចបានមែនទែនហើយ