ព័ត៌មានអន្ដរជាតិ

លោក ពូទីន ថា ការស្លាប់បាត់បង់ជីវិតពលរដ្ឋនៅតំបន់ហ្គាហ្សា គឺតក់ស្លុត និងរន្ធត់ចិត្តដូចនៅ អ៊ុយក្រែន ដែរ

បានផុស

៣ years មុន

នៅ

ថ្ងៃព្រហស្បតិ៍ ២៣ វិច្ឆិកា ២០២៣

ដោយ

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយកាលពីថ្ងៃពុធថា ការស្លាប់បាត់បង់ជីវិតរបស់ប្រជាពលរដ្ឋនៅតំបន់ហ្គាហ្សាស្ទ្រីប គឺមានភាពតក់ស្លុត និងរន្ធត់ចិត្តដូចគ្នាទៅនឹងករណីដែលកំពុងកើតមានឡើងនៅប្រទេសអ៊ុយក្រែនដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមរយៈវីដេអូទៅកាន់កិច្ចប្រជុំនៃមេដឹកនាំក្រុមប្រទេស G20, លោក ពូទីន បានលើកឡើងថា សង្គ្រាមនៅក្នុងប្រទេសអ៊ុយក្រែនគឺមិនអាចដូចគ្នាទៅនឹងជម្លោះនៅតំបន់ហ្គាហ្សាស្រ្ទីបនោះទេ ប៉ុន្តែវាធ្វើឲ្យខ្ញុំតក់ស្លុត និងរន្ធត់យ៉ាងខ្លាំងដូចគ្នា ។

ប្រធានាធិបតីរុស្ស៊ីរូបនេះបានដាក់ជាសំណួរថា “តើការសម្លាប់ជនស៊ីវិលនៅប៉ាឡេស្ទីន និងតំបន់ហ្គាហ្សាស្ទ្រីបមិនមែនជារឿងគួរឲ្យតក់ស្លុតទេឬ? ចុះចំណែករដ្ឋប្រហារបង្ហូរឈាមក្នុងប្រទេសអ៊ុយក្រែនកាលពីឆ្នាំ ២០១៤ មិនមែនជាសង្រ្គាមនៃរបបក្រុងកៀវប្រឆាំងនឹងប្រជាជនរបស់ខ្លួននៅតំបន់ Donbas ទេឬ? ទាំងអស់នេះគឺសុទ្ធតែជារឿងតក់ស្លុត និងរន្ធត់ចិត្ត” ។

លោក ពូទីន បាននិយាយទៀតថា “អ្វីដែលកំពុងកើតឡើងនៅក្នុងប្រទេសអ៊ុយក្រែន គឺជាសោកនាដកម្មមួយ ហើយពួកគេត្រូវតែស្វែងរកមធ្យោបាយដើម្បីបញ្ឈប់វា ។ មែនហើយ ការប្រើប្រាស់កម្លាំងយោធាតែងតែជាសោកនាដកម្មទៅលើមនុស្សជាតិ ក្រុមគ្រួសារ និងប្រទេសទាំងមូល ហើយជាការពិតណាស់ យើងត្រូវតែគិតពីរបៀបដើម្បីបញ្ឈប់សោកនាដកម្មដ៏ឃោរឃៅមួយនេះ” ។

ចំពោះបញ្ហានេះដែរ លោកប្រធានាធិបតីបានអះអាងថា រឿងរ៉ាវទាំងអស់ គឺដោយសារតែអ៊ុយក្រែនខ្លួនឯងទេ ដែលបដិសេធមិនព្រមចរចា ហើយថែមទាំងបិទផ្លូវសម្រាប់កិច្ចសន្ទនារកសន្តិភាពទាំងអស់ ខណៈដែលទីក្រុងមូស្គូតែងតែត្រៀមខ្លួនរួចជាស្រេចដើម្បីចាត់វិធានការដើម្បីដោះស្រាយបញ្ហាបែបនេះ ។

ជាចុងក្រោយ លោក ពូទីន បញ្ជាក់ច្បាស់ៗថា កាលដែលរុស្ស៊ីចាប់ផ្ដើមប្រតិបត្តិការយោធាពិសេសរបស់ខ្លួន គឺដើម្បីកម្ចាត់ និងបំផ្លាញតំបន់គ្មានយោធារបស់អ៊ុយក្រែន ក៏ដូចជាការពារប្រជាជនដែលនិយាយភាសារុស្ស៊ីនៅក្នុងប្រទេសនោះ ប៉ុន្តែទោះយ៉ាងណាក៏ដោយ បណ្ដាលោកខាងលិចបែរជាមើលឃើញថា ប្រត្តិបត្តិការយោធាដែលផ្ទុះឡើងនៅក្នុងខែកុម្ភៈ ឆ្នាំ ២០២២ ជាសង្រ្គាមនៃការឈ្លានពានទៅវិញ ៕