អ៊ីស្រាអែល-ហាម៉ាស នឹងដោះដូរអ្នកទោស-ចំណាប់ខ្មាំង បន្ថែមទៀត

ក្រុមហាម៉ាសនិងអ៊ីស្រាអែល ត្រូវបានគេរំពឹងថា នឹងដោះលែងចំណាប់ខ្មាំងនិងអ្នកទោសបន្ថែមទៀតនៅថ្ងៃពុធទី២៩ខែវិច្ឆិកា ដែលជាថ្ងៃចុងក្រោយនៃបទឈប់បាញ់រយៈពេលប្រាំមួយថ្ងៃ នៅក្នុងជម្លោះហ្គាហ្សាស្ទ្រីប ខណៈក៏មានការផ្តោតយកចិត្តទុកដាក់ដែរ ទៅលើថាតើអ្នកសម្រុះសម្រួលកាតា អាចចរចារកបទឈប់បាញ់មួយផ្សេងទៀតបានដែរឬក៏អត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយអ៊ីស្រាអែល ដែលដកស្រង់ប្រភពពីការិយាល័យនាយករដ្ឋមន្ត្រីបានរាយការណ៍ថា អ៊ីស្រាអែល បានទទួលបញ្ជីចំណាប់ខ្មាំងដែលរំពឹងថានឹងត្រូវក្រុមហាម៉ាសដោះលែង នៅថ្ងៃពុធ។ យ៉ាងណាក៏ដោយ ការិយាល័យ​នាយក​រដ្ឋមន្ត្រី​ មិនធ្វើអត្ថាធិប្បាយ​ភ្លាមៗ​ទេ។

តាមការលើកឡើងរបស់អ៊ីស្រាអែល, បទ​ឈប់​បាញ់ ​អាច​នឹងពង្រីកបន្ថែម​ទៀត បើ​ក្រុម​ហាម៉ាស ​បន្ត​ដោះលែង​ចំណាប់ខ្មាំង​អ៊ីស្រាអែល​យ៉ាងតិច១០នាក់​ក្នុង​មួយ​ថ្ងៃ។ ប៉ុន្តែដោយសារនៅមានស្ត្រី និងកុមារកាន់តែតិច ស្ថិតក្នុងការឃុំឃាំង, បទឈប់បាញ់ហួសពីថ្ងៃពុធ ប្រហែលជាតម្រូវឲ្យមានការចរចាដើម្បីដោះលែងបុរសជនជាតិអ៊ីស្រាអែល យ៉ាងហោចណាស់មួយចំនួនជាលើកដំបូង។

ក្រុមសកម្មប្រយុទ្ធប៉ាឡេស្ទីន ហាម៉ាស និងក្រុមសម្ព័ន្ធមិត្តឥស្លាមជីហាដ បានដោះលែងចំណាប់ខ្មាំងចំនួន១២នាក់ កាលពីថ្ងៃអង្គារ ដែលនាំឲ្យចំនួនសរុបនៃចំណាប់ខ្មាំងដែលត្រូវ ដោះលែង ក្រោយបទឈប់បាញ់ចាប់ផ្តើមកាលពីថ្ងៃសុក្រមក កើនដល់៨១នាក់។

ចំណាប់ខ្មាំង​ទាំង​នោះ ​ស្ថិត​ក្នុង​ចំណោម​មនុស្ស​ប្រហែល២៤០នាក់ ​ដែល​ខ្មាន់​កាំភ្លើង​ក្រុម​ហាម៉ាស​ចាប់​ខ្លួន ​អំឡុង​ពេល​វាយ​ប្រហារ​ទៅ​ក្នុង​ភាគ​ខាង​ត្បូងប្រទេស​អ៊ីស្រាអែល​កាល​ពី​ថ្ងៃ​ទី ៧ តុលា ដែល​អ៊ីស្រាអែល​និយាយ​ថា មនុស្ស ១២០០ នាក់​ត្រូវ​បាន​សម្លាប់។

ដោយឡែក អាជ្ញាធរសុខាភិបាលនៅហ្គាហ្សានិយាយថា ការទម្លាក់គ្រាប់បែកសងសឹករបស់អ៊ីស្រាអែល ទៅលើតំបន់ដែលគ្រប់គ្រងដោយក្រុមហាម៉ាស បានសម្លាប់មនុស្សជាង ១៥០០០ នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ WHO ព្រមានថា ពលរដ្ឋនៅហ្គាហ្សា ប្រឈមស្លាប់ដោយសារជំងឺ ច្រើនជាងការទម្លាក់គ្រាប់បែក ទៅទៀត