ទុរេនពូជម៉ាន់ថងនៅ វៀតណាម ដាក់លក់តម្លៃជាង ៦ ដុល្លារក្នុងមួយគីឡូក្រាម

ទុរេនពូជម៉ាន់ថងនៅវៀតណាមបានឡើងថ្លៃ​ ៣០ ​ភាគរយកាលពីខែវិច្ឆិកា ដោយលក់ក្នុងតម្លៃ ៦.១៩ ដុល្លារក្នុងមួយគីឡូក្រាម ដោយសារតែតម្រូវ​ការនៅចិនកើនឡើង ទន្ទឹមនឹងការផ្គត់ផ្គង់ពីប្រទេសផ្សេងធ្លាក់ចុះផង ។

បច្ចុប្បន្នទុរេន​ពូជម៉ាន់ថង​ដែល​មាន​គុណភាព​ខ្ពស់​បំផុត​ និងមាន​ទម្ងន់ចាប់​ពី ​២ ​ទៅ ​៥ ​គីឡូក្រាម ​មាន​តម្លៃ ​១៥​ ម៉ឺន​ដុង ប្រហែល ៦.១៩ ដុល្លារ​ក្នុង​មួយ​គីឡូក្រាម​ ពោល​ខ្ពស់​ជាង​រដូវ​ចេញ​ផ្លែធម្មតា​ ៦០ ភាគរយ ។ ខណៈតម្លៃទុរេនពូជ Ri6 កើនឡើង ១០ ភាគរយដោយលក់ក្នុងតម្លៃ ១២ ម៉ឺនដុង ឬ ៤.៩៥ ដុល្លារ ។

តាមរយៈពាណិជ្ជករបាននិយាយថា ការកើនឡើងតម្លៃនេះ គឺដោយសារតែ​ចិនកំពុងមានតម្រូវការខ្ពស់ ស្របពេលដែលការផ្គត់ផ្គង់របស់ប្រទេសផ្សេងមានការធ្លាក់ចុះទាបផង ជាពិសេស​កសិករ​ដាំទុរេនថៃ​​កំពុងក្រពុលមុខ ដោយសារតែបញ្ហាអាកាសធាតុ ។

កត្តានេះ បានធ្វើឲ្យកសិករវៀតណាម ទទួលបានប្រាក់ចំណេញខ្ពស់មិនធ្លាប់មានពីមុន ខណៈពាណិជ្ជករជាច្រើន នាំគ្នាកក់ប្រាក់ជាង ៤០ ភាគរយ​មុន ពោលខ្ពស់ជាងការកក់ក្នុងរដូវធម្មតាប្រមាណ ១០ ភាគរយ បើប្រៀបធៀបនឹងរយៈពេលដូចគ្នានេះ ។

គួរឲ្យដឹងថា ការនាំចេញទុរេនរបស់វៀតណាម ត្រូវបានកំណត់ នឹងឈានដល់កំណត់ត្រា ២.៥ ពាន់លានដុល្លារនៅឆ្នាំនេះ ពោលច្រើនជាង ៥ ដង បើប្រៀបធៀបនឹងឆ្នាំមុន ៕​

ប្រែសម្រួល៖ នាង រតនៈ

ប្រភព៖​ VN Express

ចុចអាន៖ ចិន ប្រកាសផែនការការពារផលប្រយោជន៍ក្រុមហ៊ុនបរទេសដើម្បីទាញការ វិនិយោគ