សីតុណ្ហភាពនៅតំបន់ស៊ីបេរី ធ្លាក់ចុះដល់ -៥០ អង្សាសេ

សីតុណ្ហភាពនៅផ្នែកខ្លះនៃតំបន់ស៊ីបេរី បានធ្លាក់ចុះដល់ -៥០អង្សាសេ ខណៈព្យុះទឹកកកវាយប្រហារទីក្រុងមូស្គូ បង្កឲ្យព្រិលធ្លាក់ខ្លាំងនិងរំខានដល់ការហោះហើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសាធារណរដ្ឋ Sakha ដែលមានទីតាំងនាភាគឦសានតំបន់ស៊ីបេរី និងមានទីក្រុងឈ្មោះ Yakutsk ដែលជាទីក្រុងត្រជាក់បំផុតមួយរបស់ពិភពលោក, សីតុណ្ហភាព បានធ្លាក់ចុះដល់ -៥០អង្សាសេ។

ស្ទើរតែទាំងអស់នៃសាធារណរដ្ឋ Sakha គឺមានទីតាំងនៅតំបន់ Permafrost ឬគេស្គាល់ថា ស្រទាប់ដីខាងក្រោមដែលកកជានិច្ច។ មានចម្ងាយ៥០០០គីឡូម៉ែត្រពីរដ្ឋធានីមូស្គូ, ទីក្រុង Yakutsk ជួនកាល បានកត់ត្រាសីតុណ្ហភាពប្រហែល -៤៤អង្សាសេ ទៅ -៤៨អង្សាសេ។

ក្នុងរយៈពេលប៉ុន្មានឆ្នាំថ្មីៗនេះ សីតុណ្ហភាព -៥០អង្សាសេបានកើតមានញឹកញាប់ដែរនៅទីនោះ ដោយសារបម្រែបម្រួលអាកាសធាតុ ហើយតំបន់ Permafrost គឺជាមុខសញ្ញាធំជាងគេនៃផលប៉ះពាល់។

ងាកមករដ្ឋធានីរុស្ស៊ីឯណោះវិញ ការធ្លាក់ព្រិលធ្ងន់ធ្ងរបំផុតមិនធ្លាប់មានពីមុនមក បានបណ្តាលឲ្យមានការពន្យារពេលជើងហោះហើរ នៅអាកាសយានដ្ឋានមួយចំនួនកាលពីថ្ងៃចន្ទ ព្រោះផ្លូវយន្តហោះ ត្រូវគ្របដណ្តប់ដោយព្រិលយ៉ាងក្រាស់។

ទីភ្នាក់ងារសារព័ត៌មាន RIA រាយការណ៍ថា ជើងហោះហើរយ៉ាងហោចណាស់៥៤ត្រូវពន្យារពេល និង៥ទៀត ត្រូវលុបចោលនៅអាកាសយានដ្ឋានធំចំនួន៣របស់រដ្ឋធានី។

សីតុណ្ហភាពនៅទីក្រុងមូស្គូ ត្រូវបានគេព្យាករថា នឹងធ្លាក់ចុះដល់ប្រហែល១៨អង្សាសេនៅចុងសប្តាហ៍នេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ សិស្សសាលាមត្តេយ្យស៊ីបេរី ងូតទឹកកកក្នុងសីតុណ្ហភាព -២៥អង្សាសេដើម្បីការពារការឆ្លងជំងឺ (មានវីដេអូ)