ឥណ្ឌូណេស៊ី ក្លាយជាប្រទេសអង្ករលំដាប់លេខ ១ របស់ ថៃ​

ការនាំចេញអង្កររបស់ថៃទៅកាន់ប្រទេស​ឥណ្ឌូណេស៊ី បានកើនឡើងគួរឲ្យកត់សម្គាល់ក្នុងរយៈពេលប៉ុន្មានខែចុងក្រោយនេះ ស្របពេលដែលឥណ្ឌូណេស៊ីកំពុងប្រឈមនឹងគ្រោះរាំងស្ងួតធ្ងន់ធ្ងរដែលបង្កឡើងដោយបាតុភូត El Nino និងការចូលមកដល់នៃរដូវវស្សាយឺតជាងរាល់ដងផងដែរ ។

អនុរដ្ឋមន្ត្រីក្រសួងពាណិជ្ជកម្មថៃលោក Naphinthorn Srisanpang ​បាននិយាយថា ក្នុងរយៈពេល ១០ ខែដំបូងនៃឆ្នាំនេះ បរិមាណនាំចេញអង្ករទៅកាន់ឥណ្ឌូណេស៊ីបានកើនឡើងយ៉ាងខ្លាំងដល់ ១.០៥ លានតោន និងមានតម្លៃ ៥២៣.៤៥ លានដុល្លារ ដែលនាំឲ្យឥណ្ឌូណេស៊ី ក្លាយជាអ្នកទិញអង្ករលំដាប់លេខ ១ របស់ថៃ ដែលក្នុងនោះភាគច្រើនជាប្រភេទអង្ករ ស ។

ទិន្នន័យ​នេះបានកើនឡើង​ជាង ១០ ដងពីទិន្នន័យកាលពីឆ្នាំមុនដែលមានត្រឹមតែ ៩១,៧១៤ តោន និងមានតម្លៃ ៤២.២៤ លានដុល្លារអាមេរិកប៉ុណ្ណោះ ហើយស្ថិតនៅលំដាប់ថ្នាក់ទី ២០ ឯណោះ ។

ចំពោះកត្តាដែលនាំឲ្យឥណ្ឌូណេស៊ី​កើនឡើងការទិញអង្ករពីថៃ គឺដោយសារគ្រោះរាំងស្ងួតបានប៉ះពាល់ដល់តំបន់ដាំដុះស្រូវ ជាពិសេសនៅកោះជ្វា និងផ្នែកខ្លះនៃកោះស៊ូម៉ាត្រាខាងត្បូង ។

បន្ថែមពីនេះ ដើម្បីបង្កើនការនាំចេញ និងផ្សព្វផ្សាយអង្ករថៃក្នុងចំណោមអ្នកទិញថ្មី លោក Naphinthorn Srisanpang លើកឡើងថា ថៃត្រូវពន្លឿនការអភិវឌ្ឍន៍ពូជស្រូវរបស់ខ្លួន ដោយផ្តោតលើការជំរុញការប្រកួតប្រជែង និងបំពេញតម្រូវការរបស់អ្នកប្រើប្រាស់ ។

គួរបញ្ជាក់ថា ការនាំចេញអង្កររបស់ថៃ ចាប់ពីខែមករាដល់ខែតុលា មានចំនួនសរុប ៦.៩២ លានតោន ដែលមានតម្លៃ ៣.៩៦ ពាន់លានដុល្លារ កើនឡើង ១១.៤ ភាគរយ និង ២៤.៧ ភាគរយ បើប្រៀបធៀបនឹងឆ្នាំមុន ខណៈ​ឥណ្ឌូណេស៊ី អាមេរិក អាហ្វ្រិក​ខាង​ត្បូង អ៊ីរ៉ាក់ និង​ចិន ជាពិសេសនាំចូលច្រើនបំផុត ៕

ប្រែសម្រួល៖ នាង រតនៈ

ប្រភព៖​ Nation Thailand

ចុចអាន ៖ ផ្សារទំនើបម៉ាក្រូរបស់ ថៃ ចេញបកស្រាយពីការចោទប្រកាន់ថា ទិញសាច់ ជ្រូកបង្កកគេចពន្ធ