ព្រះអង្គម្ចាស់ អារ៉ាប៊ីសាអូឌីត សោយទិវង្គត ក្នុងហេតុការណ៍ធ្លាក់យន្តហោះ

រាជវង្សអារ៉ាប៊ីសាអូឌីត បានប្រកាសកាលពីថ្ងៃព្រហស្បតិ៍ទី៧ខែធ្នូថា ព្រះអង្គម្ចាស់ Talal bin Abdulaziz bin Bandar bin Abdulaziz Al Saud បានសោយទិវង្គតក្នុងព្រះជន្ម៦២វស្សា។

បើយោងតាមសេចក្តីរាយការណ៍ នៅក្នុងប្រព័ន្ធផ្សព្វផ្សាយអារ៉ាប់, ព្រះអង្គម្ចាស់ បានសោយទិវង្គតនៅក្នុងហេតុការណ៍ធ្លាក់យន្តហោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការរាជវង្សអារ៉ាប៊ីសាអូឌីតបានប្រកាសពីការសោយទិវង្គតរបស់ព្រះអង្គម្ចាស់ នៅក្នុងសេចក្តីថ្លែងការណ៍ខ្លីមួយដោយលើកឡើងថា ពិធីអធិស្ឋានដល់ព្រះរាជសពរបស់ព្រះរាជាដែលសោយទិវង្គត នឹងត្រូវធ្វើឡើងនៅវិហារឥស្លាម Imam Turki bin Abdullah ក្នុងទីក្រុង រីយ៉ាដ។

ព្រះអង្គម្ចាស់ Talal bin Abdulaziz គឺជាបុត្រារបស់ព្រះអង្គម្ចាស់ Bandar និងជាព្រះរាជនត្តារបស់ស្តេចអារ៉ាប៊ីសាអូឌីតទីមួយព្រះនាម Abdulaziz។

ប្រសូតនៅឆ្នាំ១៩៦១ ព្រះអង្គគឺជាវរសេនីយ៍ឯកនៅក្នុងកងទ័ពអាកាសអារ៉ាប៊ីសាអូឌីត ហើយបំពេញព្រះរាជកិច្ចជាជំនួយការប្រធានផ្នែកចារកម្មនៅ ទីភ្នាក់ងារស៊ើបការណ៍សម្ងាត់អារ៉ាប៊ីសាអូឌីត (GIP) ចន្លោះឆ្នាំ២០០៤ ដល់ឆ្នាំ២០១២។

ថ្វីបើសេចក្តីថ្លែងការណ៍មិនបង្ហាញពីមូលហេតុនៃការសោយទិវង្គតក៏ដោយ ប៉ុន្តែសារព័ត៌មាន Al Mashhad របស់ប្រទេសលីបង់ រាយការណ៍ថា ព្រះអង្គម្ចាស់ បានសោយទិវង្គតនៅពេលដែលយន្តហោះចម្បាំង F-15 របស់ទ្រង់ ធ្លាក់ក្នុងអំឡុងពេលសមយុទ្ធហ្វឹកហាត់ជាមួយកងទ័ពអាកាសកាលពីថ្ងៃព្រហស្បតិ៍៕

ប្រែសម្រួល៖ Vann Vann

ប្រភព៖ RT

ចុចអាន៖ យន្តហោះយោធាអាមេរិក ធ្លាក់នៅជប៉ុន