Tesla ប្រមូលរថយន្តជាង ២ លានគ្រឿងត្រឡប់ចូលរោងចក្រវិញ ដោយសារ​បញ្ហាបច្ចេកទេស

ក្រុមហ៊ុន Tesla កំពុងប្រមូលរថយន្តរបស់ខ្លួនជាង ២ លានគ្រឿងនៅក្នុងទឹកដីអាមេរិក​ត្រឡប់ចូលរោងចក្រវិញ បន្ទាប់ពីបានរកឃើញថា ប្រព័ន្ធសុវត្ថិភាពស្វ័យប្រវត្តិរបស់រថយន្តមិនទាន់គ្រប់គ្រាន់ពេញលក្ខណៈដើម្បីការពារអ្នកប្រើប្រាស់នៅឡើយ ។

ការប្រមូលរថយន្តយកមកវិញនៅពេលនេះ គឺបន្ទាប់ពីមានការស៊ើបអង្កេតដោយរដ្ឋបាលសុវត្ថិភាពចរាចរណ៍ផ្លូវជាតិអាមេរិកដែលចំណុះក្រោមនាយកដ្ឋានដឹកជញ្ជូន ​​ពាក់ព័ន្ធទៅនឹងប្រព័ន្ធកាច់ចង្កូតស្វ័យប្រវត្តិ (Autosteer) ។

ប្រព័ន្ធកាច់ចង្កូតស្វ័យប្រវត្តិ (Autosteer) គឺជាប្រព័ន្ធរក្សាល្បឿនកំណត់ ចាប់សញ្ញាគន្លងផ្លូវ និងយានយន្តផ្សេងទៀតដែលនៅក្បែរ ប៉ុន្តែក្រុមហ៊ុនព្រមានថា អ្នកបើកបរគួរតែដាក់ដៃលើចង្កូត ដើម្បីការពារការកើតមានបញ្ហាណាមួយភ្លាមៗ ។

ទន្ទឹមនោះ រថយន្តដែលត្រូវប្រមូលយកមកវិញនោះ រួមមានប្រភេទ Model S ឆ្នាំ ២០១២ ដល់ឆ្នាំ ២០២៣, Model X ឆ្នាំ ២០១៦ ដល់ឆ្នាំ ២០២៣, Model 3 ឆ្នាំ ២០១៧ ដល់ឆ្នាំ ២០២៣ និង Model Y ឆ្នាំ ២០២០ ដល់ឆ្នាំ ២០២៣ ដែលសុទ្ធសឹងតែបំពាក់ដោយប្រព័ន្ធកាច់ចង្កូតស្វ័យប្រវត្តិ (Autosteer) មិនទាន់គ្រប់លក្ខណៈ ។

គួរបញ្ជាក់ថា កាលពីខែកុម្ភៈ ក្រុមហ៊ុន Tesla ក៏បានប្រមូលរថយន្តជាង ៣៦០,០០០ គ្រឿងត្រឡប់ចូលរោងចក្រវិញផងដែរ ដោយសារតែកំណែនៃកម្មវិធីបើកបរដោយស្វ័យប្រវត្តិ (Autopilot) អាចបង្កើនហានិភ័យនៃគ្រោះថ្នាក់ណាមួយជាយថាហេតុ ៕​

ប្រែសម្រួល៖ នាង រតនៈ

ប្រភព៖​ NBC