អាមេរិក ផ្ដល់រង្វាន់ជាទីគាប់ចិត្ត ១០ លានដុល្លារសម្រាប់ព័ត៌មានអ្នកផ្ដល់​លុយកាក់ដល់ក្រុមហាម៉ាស

យោងតាមការចុះផ្សាយរបស់សារព័ត៌មាន Arab News បានឲ្យដឹងថា ក្រសួងការបរទេសសហរដ្ឋអាមេរិកនឹងផ្ដល់ប្រាក់រង្វាន់ជាទីគាប់ចិត្តរហូតដល់ ១០ លានដុល្លារសម្រាប់ព័ត៌មានដែលស្គាល់ ឬដឹងពីប្រភពនៃមនុស្ស ៥ នាក់ដែលជាអ្នកផ្ដល់ហិរញ្ញប្បទានដល់ក្រុមហាម៉ាស ។

ក្រសួងការបរទេសបាននិយាយនៅក្នុងសេចក្តីថ្លែងការណ៍មួយថា អ្នកទាំងប្រាំនោះគឺមានឈ្មោះ Abdelbasit Hamza Elhassan Khair, Amer Kamal Sharif Alshawa, Ahmed Sadu Jahleb, Walid Mohammed Mustafa Jadallah និង Muhammad Ahmad ‘Abd Al-Dayim Nasrallah ដែលពីមុនមកសហរដ្ឋអាមេរិកចាត់តាំងជាភេរវករពិភពលោក ។

ក្រសួងបានបញ្ជាក់ទៀតថា អ្នកផ្ដល់លុយកាក់ដំបូងគេឈ្មោះ Hamza ដែលមានមូលដ្ឋាននៅប្រទេសស៊ូដង់ បានគ្រប់គ្រងក្រុមហ៊ុនវិនិយោគជាច្រើនសម្រាប់ក្រុមហាម៉ាស ហើយបានចូលរួមក្នុងការផ្ទេរប្រាក់ជិត ២០ លានដុល្លារទៅក្រុមប្រដាប់អាវុធប៉ាឡេស្ទីនមួយនេះ ជាពិសេសទៀតនោះ លោកក៏​ជាប់​ពាក់ព័ន្ធ​នឹង​ប្រធានាធិបតី​ស៊ូដង់ Omar Bashir និង​ក្រុមរដ្ឋឥស្លាម​ដែលកម្ទេច​ស្ថិរភាព​ក្នុង​ប្រទេស​ស៊ូដង់ផងដែរ ។

គួរបញ្ជាក់ថា ការផ្តល់រង្វាន់ជាទីគាប់ចិត្តនេះធ្វើឡើង បន្ទាប់ពីការដាក់ទណ្ឌកម្មរបស់សហរដ្ឋអាមេរិកចំនួន ៤ លើកមកលើក្រុមហាម៉ាស ក្រោយការវាយឆ្មក់ដ៏សាហាវរបស់ក្រុមប្រដាប់អាវុធប៉ាឡេស្ទីនមួយនេះចូលទៅក្នុងទឹកដីនៃប្រទេសអ៊ីស្រាអែលកាលពីថ្ងៃទី ៧ តុលា ដោយបានសម្លាប់ប្រជាពលរដ្ឋស៊ីវិលប្រមាណ ១,២០០ នាក់ ។

ជាការឆ្លើយតប អ៊ីស្រាអែលបើកការវាយប្រហារយ៉ាងសន្ធាប់ទាំងតាមផ្លូវអាកាស និងដីគោកទៅលើតំបន់ហ្គាហ្សាដោយបានឆក់យកជីវិតពលរដ្ឋប៉ាឡេស្ទីន ២២,៦០០ នាក់ និងជាង ៥៧,០០០ នាក់រងរបួស ខណៈឈ្លើយសឹកជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ប្រែសម្រួលដោយ ៖ ជីវ័ន្ត

ចុចអាន ៖ កាសែត អាមេរិក ផ្សាយឲ្យអ្នកទេសចរ មកលេងខេត្តសៀមរាប ក្នុងឆ្នាំ២០២៤នេះ