ព័ត៌មានអន្ដរជាតិ

ថៃចាប់បានមេក្លោង និងបក្ខពួកគ្រឿងញៀនជនជាតិកូរ៉េខាងត្បូងមួយក្រុម នៅបាងកក

បានផុស

២ years មុន

នៅ

ថ្ងៃសុក្រ ១២ មករា ២០២៤

ដោយ

ប៉ូលិសអន្តោប្រវេសន៍ថៃ បានប្រកាសចាប់បានមេក្លោងគ្រឿងញៀនជនជាតិកូរ៉េខាងត្បូងមួយរូប រហស្សនាមលោកលី (Mr. Lee) នៅខុនដូមួយកន្លែងក្នុងសង្កាត់ Watthana រាជធានីបាងកក កាលពីថ្ងៃព្រហស្បត៍ ទី១១ ខែមករា ឆ្នាំ២០២៤ ។

ប៉ូលិសថៃបានឃាត់ខ្លួនជនជាតិកូរ៉េវ័យ២៩ឆ្នាំខាងលើ រួមទាំងរឹបអូសបាននូវគ្រឿងញៀនប្រភេទកេតាមីន (Ketamine) ចំនួន ៣.៦៧ ក្រាម ហើយប៉ូលិសក៏បាននាំខ្លួនជនសង្ស័យរូបនេះទៅធ្វើតេស្តពិនិត្យទឹកនោមផងដែរ ជាលទ្ធផលឃើញមានសារធាតុញៀននៅក្នុងខ្លួន ។

ក្រោយលទ្ធផលពិនិត្យរកឃើញថាប្រើប្រាស់សារធាតុញៀនមេតំហ្វេតាមីន (Methamphetamine) រួចហើយ លោក លី ត្រូវបាននាំខ្លួនដើម្បីសាងសុំណុំរឿងតាមនីតិវិធី ដោយក្នុងនោះមានទាំងបទល្មើសស្នាក់នៅប្រទេសថៃដោយមានវីសាហួសសុពលភាពទៀតផង ។

ចំណែកដំណើរការស៊ើបព័ត៌មានពាក់ព័ន្ធលោក លី វិញបានឲ្យដឹងបន្ថែមថា លោកបានចូលទឹកដីថៃកាលពីថ្ងៃទី០២ ខែឧសភា ឆ្នាំ២០២២ កន្លងទៅ ហើយលោកគឺជាមេក្លោងក្រុមជួញដូរគ្រឿងញៀនដែលមានគ្នាសរុបប្រមាណ ២៧ នាក់ ដែលមានរហស្សនាមថា “Ekamai Gang” ក្នុងនោះអ្នកចែកចាយ ៣ នាក់ រួមទាំងអ្នកប្រើប្រាស់មួយចំនួនផង ។

ប្រភពព័ត៌មានថៃ Khaosod បានឲ្យដឹងដែរថា ក្នុងប្រតិបត្តិការបង្រ្កាបខាងលើ សមត្ថកិច្ចកូរ៉េខាងត្បូងបានចូលរួមសហការជាមួយប៉ូលិសថៃ ក្នុងក្របខណ្ឌប៉ូលិសអន្តរជាតិ (INTERPOL) បង្រ្កាបក្រុមគ្រឿងញៀនខាងលើនេះ ។ ក្រោយប្រតិបត្តិការក្នុងរាជធានីបាងកកបានជោគជ័យ អាជ្ញាធរមានសមត្ថកិច្ចកូរ៉េខាងត្បូង បានសូមធ្វើបត្យាប័ននាំខ្លួនលោក លី ដើម្បីកាត់ទោសតាមនីតិវិធីច្បាប់កូរ៉េខាងត្បូងពាក់ព័ន្ធនឹងករណីគ្រឿងញៀននេះផងដែរ ៕

អត្ថបទដោយ៖ មាន រតនា