បើកឆាកបោះឆ្នោតបឋម លោក ត្រាំ ឈ្នះភ្លូកទឹកភ្លូកដី នៅរដ្ឋ Iowa

អតីតប្រធានាធិបតីអាមេរិកលោក ដូណាល់ ត្រាំ បានទទួលជ័យជម្នះយ៉ាងធំធេង ក្នុងការបោះឆ្នោតបឋមរបស់គណបក្សសាធារណរដ្ឋក្នុងរដ្ឋ Iowa។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN, ក្នុងការបោះឆ្នោតរដ្ឋ Iowa នៅថ្ងៃអង្គារទី១៦ខែមករា លោក ​ត្រាំ ឈ្នះសំឡេងគាំទ្រលើស៥០% ហើយទទួលបានតំណាងរាស្រ្តលើសគូប្រជែងដល់ទៅ៣ដងឯណោះ។

តាមលទ្ធផល លោក ត្រាំ ទទួលបានសំឡេងឆ្នោត៥៦២១០ ជាមួយនឹងតំណាងរាស្រ្តចំនួន២០ ចំណែកលេខ២បានទៅលើលោក Ron DeSantis ទទួលបានសំឡេង២៣៤០០ ជាមួយតំណាងរាស្រ្តចំនួន៨រូប រីឯលេខ៣បានទៅលើលោកស្រី Nikki Haley ទទួលបានសំឡេង២១០៧៦ ជាមួយតំណាងរាស្រ្តចំនួន៧រូប។

ជ័យជម្នះភ្លូកទឹកភ្លូកដីរបស់លោកត្រាំនៅរដ្ឋ Iowa ត្រូវបានគេមើលឃើញជាសញ្ញាដ៏ល្អសម្រាប់បុរសវ័យ៧៧ឆ្នាំរូបនេះ ក្នុងការឈានទៅប្រកួតនៅរដ្ឋជាបន្តបន្ទាប់ ហើយទីបំផុតអាចក្លាយជាតំណាងបក្សសាធារណរដ្ឋ ទៅតទល់ជាមួយលោក ចូ បៃដិន ខាងគណបក្សប្រជាធិបតេយ្យ ក្នុងការបោះឆ្នោតប្រធានាធិបតីខែវិច្ឆិកា។ 

រដ្ឋ Iowa ត្រូវបានគេមើលឃើញថាមូលដ្ឋានរបស់គណបក្សសាធារណរដ្ឋ ហើយចាប់តាំងពីឆ្នាំ១៩៧២មក រដ្ឋនេះគឺជារដ្ឋដំបូងបង្អស់នៅសហរដ្ឋអាមេរិកដែលរៀបចំការបោះឆ្នោតបឋមមុនគេ។

លទ្ធផលរបស់រដ្ឋនេះពិតជាសញ្ញាដ៏សំខាន់ ពាក់ព័ន្ធការសម្រេចចិត្តរបស់រដ្ឋផ្សេងមុនការបោះឆ្នោតខែវិច្ឆិកា។ បេក្ខជនទាំងអស់នឹងធ្វើដំណើរទៅកាន់រដ្ឋ New Hampshire សម្រាប់ការបោះឆ្នោតបឋមជុំបន្ទាប់ ហើយលោក ត្រាំ ត្រូវគេរំពឹងថា នឹងរៀបចំការជួបជុំអ្នកគាំទ្រនៅក្នុងរដ្ឋនេះ ក្រោយឡើងតុលាការក្នុងទីក្រុងញូវយ៉ក។

សូមបញ្ជាក់ នៅពេលរដូវកាលបោះឆ្នោតឆ្នាំ២០២៤ ចាប់ផ្តើម អតីតប្រធានាធិបតីរូបនេះ ត្រូវប្រឈមមុខនឹងការចោទប្រកាន់ពីបទឧក្រិដ្ឋកម្មជាច្រើន រួមទាំងពាក់ព័ន្ធនឹងការជ្រៀតជ្រែកក្នុងការបោះឆ្នោត, ការផ្តល់ប្រាក់បំបិទមាត់ដល់តារាអាសអាភាស និងការកាន់កាប់ឯកសារសំខាន់ផងដែរ៕

អត្ថបទ៖ សុខ សុវណ្ណ

ចុចអាន៖ រដ្ឋកាលីហ្វ័រញ៉ា ប្រាប់ហេតុផល ទុកផ្លូវឲ្យលោក ត្រាំ ឈរឈ្មោះបោះឆ្នោត