វ៉ាក់សាំងព្យាបាលជំងឺមហារីក កំពុងឈានដល់ដំណាក់កាលពិសោធន៍លើកចុងក្រោយ

វ៉ាក់សាំង ព្យាបាលជំងឺមហារីកដែលរកឃើញដោយ ក្រុមហ៊ុនជីវបច្ចេកវិទ្យា Orbis Health Solution របស់សហរដ្ឋអាមេរិក នឹងបើកដំណើរការ ការពិសោធន៍ដំណាក់កាលទី ៣ និងជាលើកចុងក្រោយ នៅឆ្នាំ ២០២៤ នេះ។

លោកវេជ្ជបណ្ឌិត Thomas Wagner ស្ថាបនិកក្រុមហ៊ុនជីវបច្ចេកវិទ្យា Orbis Health Solutions និងជា អ្នកស្រាវជ្រាវ ជំងឺមហារីក បានបង្កើតវ៉ាក់សាំងខាងលើនេះឡើង ដោយអះអាងថា វាជាប្រភេទវ៉ាក់សាំងថ្មីមួយក្នុងការព្យាបាលជំងឺមហារីក ខុសពីវិធីព្យាបាលដោយគីមីសាស្ត្រដែលលោកចាត់ទុកថា ជាវិធីព្យាបាលបែបប្រពៃណី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Thomas Wagner បានប្រាប់សារព័ត៌មាន ABC News ថា សោកនាដកម្មសម្រាប់អ្នកជំងឺមហារីក មិនមែនដោយសារតែរោគវិនិច្ឆ័យជំងឺមហារីកប៉ុណ្ណោះទេ ប៉ុន្តែវាក៏មានចំណែកនៃការព្យាបាលផងដែរ ។ លោកពន្យល់ថា គីមីសាស្ត្រដែលគេប្រើព្យាបាលជំងឺមហារីកនោះ វាមិនត្រឹមតែសម្លាប់កោសិកាមហារីកប៉ុណ្ណោះទេ តែវាក៏សម្លាប់កោសិការផ្សេងៗរបស់មនុស្សផងដែរ ដូច្នេះហើយគេសង្កេតឃើញថា វានាំឱ្យអ្នកជំងឺរងនូវផលប៉ះពាល់ដូចជាជ្រុះសក់ ក្អួតចង្អោរ និងភាពស៊ាំចុះខ្សោយ។

ប្រភពដដែលបានឱ្យដឹងទៀតថា វ៉ាក់សាំង ព្យាបាលជំងឺមហារីកដែលរកឃើញដោយ ក្រុមហ៊ុនជីវបច្ចេកវិទ្យា Orbis Health Solution គឺមានផលប៉ះពាល់តិចបំផុតដល់អ្នកជំងឺ ព្រោះវាប្រើកោសិកាមហារីកផ្ទាល់ខ្លួនរបស់មនុស្ស ដើម្បីកំណត់ដុំសាច់ក្នុងរាងកាយ និងជំរុញឱ្យប្រព័ន្ធការពាររាងកាយទទួលស្គាល់កោសិកាមហារីក “ថាជាជំងឺ” ដូច្នេះទើបវាអាចប្រយុទ្ធប្រឆាំងនឹងជំងឺមហារីកបាន។ លោកវេជ្ជបណ្ឌិតរូបនេះ មានជំនឿថា នេះអាចជាគន្លឹះក្នុងការព្យាបាលជំងឺមហារីកគ្រប់ប្រភេទ ។

ជាមួយគ្នានេះដែរ ក៏មានសំនួរជាច្រើនសួរថា “តើវ៉ាក់សាំងខាងលើ ចេញឱ្យប្រើប្រាស់នៅពេលណា?” លោក Thomas Wagner តបថា រដ្ឋបាលចំណីអាហារ និងឱសថអាមេរិក (FDA) បានផ្តល់ភ្លើងខៀវសម្រាប់វ៉ាក់សាំងរបស់លោក ដើម្បីចូលទៅក្នុងការសាកល្បងព្យាបាលដំណាក់កាលទី ៣ បន្ទាប់ពីទទួលបានលទ្ធផលប្រសើរនៅក្នុងដំណាក់កាលទី១ និងទី២ ។ ហើយដំណើរការពិសោធន៍លើកនេះអាចចាប់ផ្តើមនៅឆ្នាំថ្មីនេះបាន ដោយមានបំណងឱ្យមានអ្នកចូលរួម ៥០០នាក់ និងត្រូវការពេលវេលារយ:ពេល ៣ ឆ្នាំ។ លោក Thomas Wagner បញ្ជាក់ថា មុននឹងអនុញ្ញាតឱ្យប្រើប្រាស់វ៉ាក់សាំងខាងលើនេះ គឺត្រូវតែជោគជ័យនៅក្នុងដំណាក់កាលទី៣ និងត្រូវការ ការទទួលស្គាល់ពី រដ្ឋបាលចំណីអាហារ និងឱសថអាមេរិក (FDA) ជាមុនសិន ។យ៉ាងណាមិញ លោក Thomas Wagner បានបង្ហាញថា សម្រាប់ដំណាក់កាលទី៣ នេះអ្វីដែលជាឧបសគ្គគឺផ្នែកហិរញ្ញ ដែលវាទាមទារថវិការប្រហែល ១០០លានដុល្លារ ឯនោះ ៕

ប្រែសម្រួលដោយ÷ ប៉ោ កុសល

ប្រភព÷ ABC News, Zingnews