មន្ត្រីជាន់ខ្ពស់ អាមេរិក-ចិន ហោះទៅ ថៃ ដើម្បីពិភាក្សាបន្ថូរកម្ដៅវាយប្រហារ​របស់ក្រុមហ៊ូធីនៅសមុទ្រក្រហម

ទីប្រឹក្សាសន្តិសុខជាតិអាមេរិកលោក Jake Sullivan កំពុងហោះហើរទៅកាន់ប្រទេសថៃដើម្បីជួបពិភាក្សាជាមួយរដ្ឋមន្ត្រីការបរទេសចិនលោក Wang Yi ស្ដីអំពីស្ថានភាពបាញ់បោះរបស់ក្រុមឧទ្ទាមហ៊ូធីលើផ្លូវដឹកជញ្ជូននៅសមុទ្រក្រហម និងបញ្ហាជាច្រើនផ្សេងទៀតផងដែរ ។ នេះបើយោងតាមការចុះផ្សាយដោយកាសែតអាមេរិក The Wall Street Journal (WSJ) នៅថ្ងៃទី២៦ ខែមករានេះ ។

បើមិនមានអ្វីប្រែប្រួលទេនោះ មន្ត្រីជាន់ខ្ពស់ប្រទេសទាំងពីរនឹងអង្គុយចុះដើម្បីពិភាក្សាអំពីការបាញ់បោះគ្រាប់រ៉ុកកែត និងយន្តហោះគ្មានមនុស្សបើកលើកប៉ាល់ពាណិជ្ជកម្ម និងនាវាផ្សេងទៀតពីសំណាក់ក្រុមឧទ្ទាមរបស់យេម៉ែននៅថ្ងៃទី២៦ ដល់ថ្ងៃទី២៧ ខែមករានេះ ។

ទន្ទឹមនោះ ជំនួបនេះកើតមានឡើង បន្ទាប់ពីរដ្ឋាភិបាលទីក្រុងវ៉ាស៊ីនតោនបានបន្ថែមភ្លើងទៅលើចិនដើម្បីឲ្យជួយទាញប្រទេសអ៊ីរ៉ង់គ្រប់គ្រងក្រុមឧទ្ទាមហ៊ូធីដែលមានមូលដ្ឋាននៅប្រទេសយេម៉ែន ដែលបាននិងកំពុងបើកការវាយសន្ធាប់មិនបន្ថូរដៃទៅលើកប៉ាល់នៅលើផ្លូវសមុទ្រក្នុងរយៈពេលប៉ុន្មានខែថ្មីៗនេះ ។

យោងតាមកាសែតអង់គ្លេស Financial Times បានរាយការណ៍ថា អ៊ីរ៉ង់​បាន​និង​កំពុងធ្វើជាខ្នងបង្អែកដល់​ក្រុមហ៊ូធីដោយ​ផ្តល់ទាំង​អាវុធ និងគ្រាប់​បាញ់តាម​រយៈមធ្យោបាយ​ផ្សេងៗគ្នា ហើយទីក្រុងវ៉ាស៊ីនតោនស្នើទៅទីក្រុងប៉េកាំងដែលមានទំនាក់ទំនងមិត្តភាពស្អិតរមួតជាមួយប្រទេសអ៊ីរ៉ង់ ជួយបញ្ចុះបញ្ចូលឲ្យរដ្ឋាភិបាលទីក្រុងតេហេរ៉ង់បន្ធូរបន្ថយភាពតានតឹងនេះ ។

គួរបញ្ជាក់ថា ជំនួបរវាងលោក Jake Sullivan និងលោក Wang Yi នៅប្រទេសថៃនឹងក្លាយជាកិច្ចចរចាបន្ថូរស្ថានភាពតាងតឹងណាមួយផ្សេងទៀត ក៏ដូចជាបង្កើនទំនាក់ទំនងរវាងអាមេរិក និងចិនដែលទើបតែមានភាពធូរស្បើយ ក្រោយជំនួបរវាងលោក Joe Biden និងលោក Xi Jinping កាលពីខែវិច្ឆិកា ឆ្នាំ២០២៣ កន្លងទៅនៅទីក្រុង San Francisco ៕

ដោយ ៖ សុខ ជីវ័ន្ត

ចុចអាន ៖ អនាគតប្រធានាធិបតី តៃវ៉ាន់ បន្តគោលនយោបាយចាស់ពឹង អាមេរិក ជាខ្នង បង្អែកការពារច្រកសមុទ្រតៃវ៉ាន់