ព័ត៌មានអន្ដរជាតិ

២០២៣ ហូលីវូដ អាមេរិក លែងជាប់ជារឿងល្បីក្នុងបញ្ជីរោងភាពយន្ត ចិន

បានផុស

៦ ខែ មុន

នៅ

ថ្ងៃសៅរ៍ ២៧ មករា ២០២៤

ដោយ

ខ្សែភាពយន្តហូលីវូដសហរដ្ឋអាមេរិកលែងមានវត្តមានជាប់ក្នុងបញ្ជីភាពយន្ត ១០ រឿងដែលមានប្រជាប្រិយភាពក្នុងប្រទេសចិនទៀតហើយ ។ នេះបើតាមសារព័ត៌មាន New York Times បានរាយការណ៍ពីបញ្ជីរឿងល្បីទាំង ១០ ដែលមានអ្នកទស្សនាច្រើននៅចិនប្រចាំឆ្នាំ ២០២៣ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានដដែលបានឲ្យដឹងថា នេះជាលើកទីពីរហើយដែលរឿងភាពយន្តរបស់អាមេរិកមិនអាចទាក់ទាញទស្សនិកជនចិនបានច្រើន ដែលនាំឲ្យមិនមានរឿងអាមេរិកណាមួយអាចជាប់ក្នុងបញ្ជីល្បីរបស់ចិនបាន ហើយការណ៍នេះទាញអ្នកជំនួញ និងអ្នកជំនាញនៅក្នុងឧស្សាហកម្មផលិតកម្មភាពយន្តហូលីវូដក៏ចាប់ផ្តើមទទួលស្គាល់ថា ប្រជាពលរដ្ឋចិនលែងនិយមទស្សនាភាពយន្តបរទេសច្រើនដូចពីពេលមុន។

រយៈពេលជាច្រើនឆ្នាំហើយ ប្រទេសចិនបានបើកទីផ្សាររបស់ខ្លួន ទទួលឧស្សាហកម្មភាពយន្តអាមរិក ប៉ុន្តែមកត្រឹមឆ្នាំ ២០២០ ពុំមានរឿងអាមេរិកណាមួយជាប់កំណត់ត្រាមានអ្នកទស្សនាចិនច្រើននោះឡើយ ពិសេសនៅក្រោយពេលវិបត្តិកូវីដ ដែលធ្វើឲ្យប្រទេសត្រូវដាក់ការបិទខ្ទប់ការធ្វើដំណើរ ទាំងជាតិ និងអន្តរជាតិ ក៏ដូចជាហេតុផលមួយទៀតគឺស្ថានភាពតានតឹងលើវិស័យសំខាន់ៗរវាងប្រទេសមហាអំណាចទាំងពីរ។

ទន្ទឹមនឹងនោះដែរ គុណភាពផលិតរបស់ផលិតករចិនក៏បានកើនឡើងគួរកត់សម្គាល់ ទាំងគុណភាពសាច់រឿង ផ្សារភ្ជាប់នឹងទិដ្ឋភាពវប្បធម៌ដើមរបស់ចិន ធ្វើឲ្យរោងភាពយន្តនៅទូទាំងប្រទេសចិនពេញៗទៅដោយរឿងក្នុងស្រុក ។

គួររំឭកដែរថា មិនត្រឹមតែនៅប្រទេសចិនប៉ុណ្ណោះទេ ដែលរឿងអាមេរិកមានបញ្ហាធ្លាក់ចុះអ្នកទស្សនា ដោយសារតែមូលហេតុមួយចំនួនកើតចេញពីបញ្ហានយោបាយរវាងប្រទេស និងប្រទេស ហើយជាក់ស្តែងប្រទេសវៀតណាមបានបិទរឿងហូលីវូដចំណងជើង “Barbie” មិនឲ្យចាក់បញ្ជាំងក្នុងប្រទេសរបស់ខ្លួន ដោយហេតុថាសាច់រឿងមួយផ្នែកបានបង្ហាញពីទិដ្ឋភាពផែនទីសមុទ្រចិនខាងត្បូង ស្ថិតនៅក្រោមការគ្រប់គ្រងរបស់ចិន ស្របពេលដែលវៀតណាម និងចិននៅមានជម្លោះប្រទាំងប្រទិសគ្នាលើករណីគ្រប់គ្រងផ្នែកខ្លះនៃដែនសមុទ្រនោះ ៕

ដោយ៖ មាន រតនា