ព័ត៌មានអន្ដរជាតិ

តុលាការ មីយ៉ាន់ម៉ា ចេញបញ្ជាឲ្យដាក់លក់ផ្ទះវីឡាលោកស្រី អ៊ុងសាន ស៊ូជី តម្លៃចាប់ពី ៩០ លានដុល្លារ

បានផុស

២ years មុន

នៅ

ថ្ងៃចន្ទ ២៩ មករា ២០២៤

ដោយ

តុលាការកំពូលដែលគ្រប់គ្រងដោយរដ្ឋាភិបាលយោធាមីយ៉ាន់ម៉ាបានចេញបញ្ជាឲ្យដាក់លក់ផ្ទះវីឡារបស់លោកស្រី អ៊ុងសាន ស៊ូជី ក្នុងតម្លៃចាប់ពី ៩០ លានដុល្លារ ។ នេះបើយោងតាមការចេញផ្សាយដោយសារព័ត៌មានមីយ៉ាន់ម៉ា The Irrawaddy កាលពីសប្ដាហ៍មុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី អ៊ុងសាន ស៊ូជី ដែលត្រូវបានរដ្ឋាភិបាលយោធាមីយ៉ាន់ម៉ាចាប់ឃុំខ្លួនម្តងទៀត បន្ទាប់ពីរដ្ឋប្រហារយោធានៅឆ្នាំ២០២១ នៅតែជាប់គាំងនៅក្នុងជម្លោះផ្លូវច្បាប់ជាមួយបងប្រុសរបស់លោកស្រី ដែលបានអូសបន្លាយអស់រយៈពេលជាច្រើនទសវត្សរ៍ ពាក់ព័ន្ធនឹងកម្មសិទ្ធិលើផ្ទះវីឡាដ៏ចំណាស់មួយនេះនៅមាត់បឹងទន្លេសាប Inya ។

យោងតាមប្រភពដែលសុំមិនបញ្ចេញឈ្មោះបាននិយាយថា “ការដាក់ដេញថ្លៃនេះត្រូវបានធ្វើឡើងតាមសេចក្ដីសម្រេចរបស់តុលាការ ហើយនឹងធ្វើឡើងនៅថ្ងៃទី២០ ខែមីនា ឆ្នាំ២០២៤ ។ ប្រសិនបើមានអ្នកទិញ ផ្ទះនឹងត្រូវលក់ ហើយយើងនឹងរង់ចាំមើលថា តើមានអ្នកទិញដែរឬទេ?” ។

លោកស្រី អ៊ុងសាន ស៊ូជី ត្រូវបានពួកយោធាឃុំខ្លួននៅក្នុងផ្ទះដ៏ចំណាស់មួយនេះ ដែលស្ថិតនៅក្នុងទីក្រុងយ៉ាំងហ្គោនរហូតដល់ឆ្នាំ ២០១២ ហើយបន្ទាប់មកលោកស្រីបានផ្លាស់ទៅរស់នៅទីក្រុងណៃពិដោរដើម្បីចូលទៅក្នុងសភា បន្ទាប់ពីលោកស្រីត្រូវបានដោះលែងឲ្យមានសេរីភាពឡើងវិញ ។

លោកស្រីធ្លាប់បានថ្លែងសុន្ទរកថាទៅកាន់ហ្វូងអ្នកគាំទ្រពីលើយ៉ដែកមុខផ្ទះ ហើយវីឡាមួយនេះក៏ធ្លាប់ជាទីតាំងនៃជំនួបរបស់លោកស្រីជាមួយនឹងបុគ្គលល្បីៗជាច្រើននាក់ដូចជា អតីតប្រធានាធិបតីអាមេរិក បារ៉ាក់ អូបាម៉ា និង លោកស្រី ហ៊ីលឡារី គ្លីនតុន រដ្ឋមន្ត្រីការបរទេសអាមេរិកជាដើម ។

គួរបញ្ជាក់ថា លោក អ៊ុងសាន អ៊ូ បងប្រុសរបស់លោកស្រី អ៊ុងសាន ស៊ូជី បានដាក់បណ្ដឹងនេះជាលើកដំបូងក្នុងឆ្នាំ២០០០ ដើម្បីបែងចែកទ្រព្យសម្បត្តិដែលបានដាក់ឈ្មោះម្ដាយរបស់អ្នកទាំងពីរ គឺលោកស្រី ឃិន គី ហើយត្រូវបានតុលាការសម្រេចឲ្យបងប្អូនទាំងពីរនាក់ត្រូវចែកគ្នានូវប្រាក់ដែលបានមកពីការលក់ផ្ទះមួយនេះ ៕