ណាតូ ថា រុស្ស៊ី អាចវាយប្រហារគ្រប់គោលដៅនៅអឺរ៉ុប បើផ្ទុះសង្គ្រាម ជាមួយលោកខាងលិច 

បណ្តាមេទ័ពអង្គការណាតូ បានព្រមានខ្លាំងៗថា ប្រធានាធិបតីរុស្ស៊ីលោក វ្ល៉ាឌីមៀរ ពូទីន អាចវាយប្រហារគ្រប់គោលដៅទូទាំងទ្វីបអឺរ៉ុប បើសង្គ្រាមជាមួយលោកខាងលិច ផ្ទុះឡើងមែន ហើយប្លុកនេះ សល់ពេលមិនដល់បីឆ្នាំទៀតទេ ដើម្បីត្រៀមខ្លួនសម្រាប់ការវាយលុកដ៏មានសក្តានុពលពីសំណាក់កងទ័ពរុស្ស៊ីនៅលើទឹកដីអឺរ៉ុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្នាក់ដឹកនាំប្រាប់ទៅកាសែត Times កាលពីថ្ងៃអាទិត្យទី២៨ខែមករាថា គោលដៅដែលរុស្ស៊ីទំនងវាយប្រហារ នឹងជាហេដ្ឋារចនាសម្ព័ន្ធស៊ីវិលឬយោធា ហើយអាល្លឺម៉ង់ ជាគោលដៅដ៏សំខាន់មួយ ព្រោះប្រទេសនោះជាក្បាលម៉ាស៊ីនរបស់ណាតូ។ 

ស្របពេលជាមួយគ្នានោះដែរ មេទ័ពអាល្លឺម៉ង់ និងជាមេបញ្ជាការមជ្ឈមណ្ឌលភស្តុភារយោធាអង្គការណាតូ នៅភាគនិរតីប្រទេសលោក Alexander Sollfrank បាននិយាយថា “ប្រសិនបើយើងប្រៀបធៀបសង្រ្គាមនិងប្រតិបត្តិការកាលពី១០ឆ្នាំមុនឬ ៥ឆ្នាំមុន នោះយើងដឹងថា យើងត្រូវតែទទួលស្គាល់ថា តំបន់អឺរ៉ុបគឺជាកន្លែងមានការប្រកួតប្រជែងយ៉ាងខ្លាំង”។

តាមការអះអាងពីមេទ័ពរូបនេះ រុស្ស៊ី នឹងធ្វើប្រតិបត្តិការដោយបំផ្លាញខ្សែទំនាក់ទំនង ហើយចាប់ផ្តើមសង្គ្រាមអេឡិចត្រូនិក រួចវាយប្រហារដោយមីស៊ីលនិងយន្តហោះគ្មានមនុស្សបើកយកតែម្តង។

ដោយឡែក ឧត្តមសេនីយ៍ឯក Jan-Willem Maas ប្រធានបញ្ជាការគាំពារការពារជាតិរបស់កងកម្លាំងប្រដាប់អាវុធហូឡង់ ក៏អះអាងដែរថា ពិតជាមានភាពចាំបាច់ សម្រាប់ការត្រៀមលក្ខណៈចំពោះជម្លោះទូទាំងប្លុកនេះ។ ប្រសិនបើក្រឡេកមើលអ្វីដែលលោកពូទីន ធ្វើមកទល់ពេលនេះ រុស្ស៊ីអាចមានវិធីថ្មី។ ក្រោយវាយលុកអ៊ុយក្រែន លោកពូទីន ដឹងច្បាស់ថា អឺរ៉ុបរួបរួមគ្នារបៀបម៉េច។

កាលពីសប្តាហ៍មុន រដ្ឋមន្ត្រីការពារជាតិអាល្លឺម៉ង់លោក Boris Pistorius ក៏ព្រមានដែរថា រយៈពេលប្រមាណជា ៥ ទៅ ៨ ឆ្នាំខាងមុខ កម្លាំងទ័ពរបស់លោក ពូទីន​ នឹងអាចបើកការវាយប្រហារទៅលើបណ្ដាប្រទេសជាសមាជិកអង្គការណាតូ។

ថ្លែងក្នុងបទសម្ភាសជាមួយកាសែតអាល្លឺម៉ង់ Der Tagesspiegel, លោក Pistorius លើកឡើងថា “យើងបានឮការគំរាមកំហែងពីវិមានក្រឹមឡាំងស្ទើររាល់ថ្ងៃ ដូច្នេះយើងចាត់ទុកវោហារស័ព្ទរបស់លោក ពូទីន ថាអាចនឹងបង្កសង្គ្រាមលើប្រទេសណាតូនៅថ្ងៃណាមួយជាក់ជាមិនខាន ប៉ុន្តែវាមិនមែនឆេះឆួលនៅពេលនេះទេ អាចពី ៥ ទៅ ៨ ឆ្នាំខាងមុខ”។

ចាប់តាំងពីលោក ពូទីន ផ្តើមការលុកលុយទ្រង់ទ្រាយធំលើអ៊ុយក្រែនក្នុងខែកុម្ភៈ ឆ្នាំ ២០២២មក មន្ត្រីជាន់ខ្ពស់វិមានក្រឹមឡាំងបានព្រលយពាក្យថា វាគ្រាន់តែជាការចាប់ផ្តើមនៃមហិច្ឆិតាអធិរាជប៉ុណ្ណោះ! លោកពូទីន កំពុងសម្លឹងមើលលើរដ្ឋសមាជិកណាតូ នៅភាគខាងកើតជាច្រើនទៀត។

ហេតុនេះហើយ ទើបធ្វើឲ្យមជ្ឈដ្ឋានមួយចំនួនបង្ហាញក្តីបារម្ភ ហើយប៉ូឡូញ ក៏បានចេញការព្រមានពីពេលវេលាផងដែរ ដោយប្រាប់ឲ្យសមាជិកណាតូ កុំអូសបន្លាយពេលយូរពេក ត្រូវត្រៀមខ្លួនឲ្យបានឆាប់តាមដែលអាចធ្វើទៅបាន៕

អត្ថបទ៖ សុខ សុវណ្ណ

ចុចអាន៖ អាល្លឺម៉ង់ ថា ទ័ពលោក ពូទីន នឹងវាយលុកអង្គការណាតូ ៥ ទៅ ៨ ឆ្នាំទៀត