ព័ត៌មានអន្ដរជាតិ

រថភ្លើង ឡាវ-ចិន បង្កើនល្បឿនរត់ ១២ ជើងក្នុងមួយថ្ងៃ បំពេញតម្រូវការភ្ញៀវ

បានផុស

២ years មុន

នៅ

ថ្ងៃព្រហស្បតិ៍ ១ កុម្ភៈ ២០២៤

ដោយ

ក្រុមហ៊ុនបណ្តាញរថភ្លើង ឡាវ-ចិន ប្រកាសកាលពីថ្មីៗនេះថា បានបង្កើនជើងចេញដំណើរប្រចាំថ្ងៃដល់ ១២ ជើងក្នុងមួយថ្ងៃបន្ថែមទៀតសម្រាប់អ្នកដំណើរទេសចរ ខណៈការអនុវត្តនេះបានដាក់ដំណើរការកាលពីចុងខែមករា ឆ្នាំ ២០២៤កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានឡាវ Laotiantimes បានឲ្យដឹងថា ការចេញប្រតិបត្តិការបន្ថែមនេះ គឺដើម្បីទទួលស្វាគមន៍កំណើនភ្ញៀវទេសចរកើនឡើងច្រើនតាមការរំពឹងទុក ពិសេសស្របតាមយុទ្ធនាការទេសចរ “ទស្សនាប្រទេសឡាវប្រចាំឆ្នាំ២០២៤”។

ជាការឆ្លើយតបទៅនឹងកំណើនតម្រូវការនៃការធ្វើដំណើរតាមរថភ្លើង ក្រុមហ៊ុនបណ្តាញរថភ្លើងសហប្រទេសនេះ (ចិន-ឡាវ) បានពង្រីកសេវានានាបស់ខ្លួនយ៉ាងមានប្រសិទ្ធភាព មានដូចជាការដាក់ឲ្យប្រើនូវប្រភេទរថភ្លើងដើរដោយអគ្គិសនី (EMU Train) និងការទិញសំបុត្ររថភ្លើងតាមប្រព័ន្ធអនឡាញនៅលើទូរសព្ទដៃជាដើម។

តាមទិន្នន័យឆ្នាំ២០២៣ ជើងរថភ្លើងល្បឿនលឿនឆ្លងប្រទេសនេះ មានកំណើនអ្នកដំណើរគិតជាភាគរយ១០៣.៧% ដែលគិតជាចំនួនអ្នកដំណើរប្រមាណ ១.៧៥លាននាក់ បានធ្វើដំណើរពីខែមករា ដល់ខែកញ្ញា។

ចំណែកការដឹកជញ្ជូនទំនិញតាមបណ្តាញរថភ្លើងខាងលើក៏ទទួលបានជោគជ័យផងដែរ ពិសសការដឹកជញ្ជូនទំនិញផ្លែឈើនាំចូលពីប្រទេសថៃ ដឹកឆ្លងទៅកាន់ប្រទេសចិន ដែលពីមុនប្រើប្រាស់ពេលរយៈពេល២ថ្ងៃ តាមឡានដឹកទំនិញផ្លូវគោក និងកាត់បន្ថយនៅត្រឹមរយៈពេល១៥ម៉ោង ឆ្លងកាត់តាមសេវារថភ្លើងល្បឿនលឿននេះ។

គួររំឭកថា រថភ្លើងល្បឿនលឿន ឡាវ-ចិន បានក្លាយជាបណ្តាញស្នូលសំខាន់មួយដែលជំរុញឡាវ ពីប្រទេសគ្មានដែនសមុទ្រ ទៅបើកឆ្ពោះទៅបណ្តាញពិភពលោក ។ ចាប់តាំងពីឆ្នាំ២០២១ ដែលជាឆ្នាំដាក់ដំណើរការផ្លូវការនៃរថភ្លើងល្បឿនលឿននេះ បណ្តាញរថភ្លើង ឡាវ-ចិន បានធ្វើប្រតិបត្តិការដោយជោគជ័យ ទាំងក្នុងស្រុកឡាវ និងចិន ដោយបានភ្ជាប់ការធ្វើដំណើររបស់អ្នកដំណើរក្នុងស្រុក និងក្រៅស្រុកប្រមាណជាង ៣.១ លាននាក់ ដែលមានការធ្វើដំណើរប្រចាំថ្ងៃប្រហែល ៤,៨៨៩ នាក់ និងច្រើនបំផុតដល់ ១០,៩១៧ នាក់។ ក្នុងនោះបានភ្ជាប់ការធ្វើដំណើរកាត់ភ្នំ ស្ពាន ពីរដ្ឋធានីវៀងចន្ទន៍ ទៅដល់ទីក្រុង Kunming នៃខេត្តយូណានប្រទេសចិន ក៏ដូចជាពីវៀងចន្ទន៍ទៅកាន់ទីក្រុងប៉េកាំងផងដែរ ៕