កងទ័ពមីយ៉ាន់ម៉ានឹងចាប់ផ្តើមកេណ្ឌយុវជនឱ្យចូល​បម្រើ​កងទ័ព​នៅ​ខែ​មេសា

ប្រភពព័ត៌មានបានឱ្យដឹងថា កងទ័ពមីយ៉ាន់ម៉ាគ្រោង​នឹងចាប់ផ្តើមកេណ្ឌ​យុវជនឱ្យចូល​បម្រើកងទ័ពចាប់​ពី​ខែ​មេសាតទៅ ហើយក៏នៅបាន​តម្រូវ​ឱ្យមន្ត្រី​សន្តិសុខដែល​ចូល​និវត្តន៍ទៅហើយឱ្យ​ត្រឡប់​មក​បម្រើ​រាជការវិញផង​ដែរ។ នេះបើយោងតាមប្រភពដែលដកស្រង់សម្តីរបស់អ្នកនាំពាក្យរដ្ឋាភិបាលយោធាមីយ៉ាន់ម៉ា ខណៈដែល​កងទ័ពកំពុង​ព្យាយាម​បង្ក្រាបការបង្កអសន្តិសុខប្រឆាំង​របបសឹក​យោធា។

ប្រភពបន្តថា កាលពីថ្ងៃសៅរ៍​មុន រដ្ឋាភិបាលរបបសឹកយោធាបានប្រកាសច្បាប់ស្តីពីការបំពេញកាតព្វកិច្ចចូលបម្រើកងទ័ពដែលនឹងអនុវត្តចំពោះយុវជន ពោលគឺបុរសដែលមានអាយុពី ១៨-៣៥ ឆ្នាំ និងស្ត្រីដែលមានអាយុពី ១៨-២៧ ឆ្នាំត្រូវចូលបម្រើកងទ័ពយ៉ាងហោចណាស់២ឆ្នាំ។ កាលពីថ្ងៃអង្គារ រដ្ឋាភិបាល​យោធា​បាន​និយាយ​ថា ខ្លួន​នឹង​ចាប់​ផ្តើមកេណ្ឌកងទ័ព​ក្នុង​ខែ​មេសាខាងមុខនេះតទៅ។

អ្នក​នាំពាក្យរដ្ឋាភិបាលរបបសឹកយោធា លោក Zaw Min Tun បាននិយាយថា៖ “យើង​កំពុងតែ​ធ្វើ​ការ​ដើម្បី​អនុវត្តការកេណ្ឌកងទ័ព​បន្ទាប់​ពី​ថ្ងៃ​ឈប់​សម្រាក​ចូលឆ្នាំ​ថ្មី​ក្នុង​ខែ​មេសា ព្រមទាំងនឹងមានការត្រួតពិនិត្យសុខភាព ដែលចូលត្រួតពិនិត្យក្នុងមួយលើកប្រមាណ ៥០០០នាក់”។

រដ្ឋាភិបាលរបបសឹកយោធា​មិន​បានបង្ហាញ​លម្អិតពាក់ព័ន្ធនឹងភាពរឹងមាំរបស់កងទ័ពនោះ​ទេ។ ប៉ុន្តែ​អ្នក​វិភាគ និង​អ្នក​ការទូត​នៅ​អាស៊ីអាគ្នេយ៍​បាននិយាយ​ថា កងទ័ពមីយ៉ាន់ម៉ា​ប្រឈម​នឹង​បញ្ហាកេណ្ឌកងកំលាំង និងប្រើប្រាស់អ្នកដែលមិនធ្លាប់ប្រយុទ្ធឱ្យឡើងទៅកាន់មរភូមិមុខ ។

សូមជម្រាបផងដែរថា ប្រទេសមីយ៉ាន់ម៉ាបានស្ថិតក្នុងភាពចលាចល ចាប់តាំងពីយោធាឡើងកាន់អំណាចនៅក្នុងរដ្ឋប្រហារកាលពីថ្ងៃទី១ ខែកុម្ភៈ ឆ្នាំ២០២១ ដោយបានបិទបញ្ចប់ការគ្រប់គ្រងតាមបែបប្រជាធិបតេយ្យក្នុងរយៈពេល ១០ ឆ្នាំ ដោយបង្កឲ្យមានការតវ៉ាទ្រង់ទ្រាយធំ ហើយយោធាក៏បានបើកការបង្ក្រាបលើក្រុមអ្នកប្រឆាំងផងដែរ ។

ទន្ទឹមនោះ រយៈពេល ៣ ឆ្នាំមកនេះ រដ្ឋាភិបាលយោធាក៏កំពុងខ្នះខ្នែងដើម្បីកម្ទេចសម្ព័ន្ធក្រុមប្រដាប់អាវុធជនជាតិភាគតិចនៅភាគខាងជើង និងភាគខាងត្បូង ប៉ុន្តែហាក់ដូចជាមិនគាប់ដូចបំណងឡើយ ស្របពេលដែលថ្មីៗនេះតំបន់ភាគច្រើនរបស់ប្រទេសក៏ធ្លាក់ចូលកណ្ដាប់ដៃរបស់ក្រុមឧទ្ទាមទ័ពព្រៃទៅទៀត ៕

អត្ថបទដោយ៖ គង់ សំអាន