លោក ថាក់ស៊ីន ស៊ីណាវ៉ាត្រា ត្រៀមទទួលស្វាគមន៍សម្ដេចតេជោ ហ៊ុន សែន ដែលនឹងអញ្ជើញទៅសួរសុខទុក្ខ

លោក ថាក់ស៊ីន ស៊ីណាវ៉ាត្រា កំពុងត្រៀមទទួលស្វាគមន៍អតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ដែលនឹងអញ្ចើញធ្វើដំណើរទៅកាន់ទីក្រុងបាងកក ដើម្បីសួរសុខទុក្ខលោក ។នេះបើយោងតាមការចុះផ្សាយរបស់សារព័ត៌មាន Bangkok Post នៅថ្ងៃទី២០ ខែកុម្ភៈ ។

សារព័ត៌មាន Bangkok Post បានធ្វើការអត្ថាធិប្បាយថា អតីតនាយករដ្ឋមន្ត្រីថៃ និងអតីតនាយករដ្ឋមន្ត្រីកម្ពុជា ទាំងពីររូប បានបង្កើតទំនាក់ទំនងដ៏រឹងមាំជាមួយគ្នាអស់រយៈពេលច្រើនឆ្នាំមកហើយ ហើយអំឡុងពេលនេះ លោក ថាក់ស៊ីន ក៏បានត្រៀមខ្លួនស្វាគមន៍សម្ដេចតេជោ ហ៊ុន សែន ដែលនឹងចាកចេញពីកម្ពុជា ធ្វើដំណើរទៅកាន់ទីក្រុងបាងកក ដើម្បីសួរសុខទុក្ខគាត់ បន្ទាប់ពីត្រូវបានតុលាការសម្រេចកាត់ទោសព្យួរ ឱ្យរស់នៅក្រៅឃុំ ។ ប៉ន្តែប្រភពមិនបានបញ្ជាក់ទេថា តើថ្ងៃណាម្ដេចតេជោ នឹងអញ្ជើញទៅដល់ ។

សូមបញ្ជាក់ថា កាលពីថ្ងៃទី ១៨ ខែកុម្ភៈ លោក ថាក់ស៊ីន ស៊ីណាវ៉ាត្រា ត្រូវបានតុលាការថៃសម្រេចកាត់ទោសព្យួរពិសេស និងឱ្យរស់នៅក្រៅឃុំសាកល្បងរយ:ពេល ៦ខែ ហើយប្រសិនបើគាត់អនុវត្តត្រឹមត្រូវទៅតាមលក្ខខណ្ឌច្បាប់ដែលបានកំណត់ នោះ៦ ខែក្រោយ គាត់នឹងត្រូវតុលាការប្រកាសរួចទោសទាំងអស់តែម្ដង ។ គ្រាន់តែបានត្រឡប់មកផ្ទះវិញ គេឃើញនៅលើបណ្ដាញសង្គមថៃមានការសាទរជាខ្លាំងទៅកាន់បុរសអ្នកជំនួញវ័យ ៧៤ឆ្នាំរូបនេះ ។ ហើយចំពោះស្ថានភាពសុខភាពរបស់គាត់ ក៏មិនមានសញ្ញាគួរឱ្យព្រួយបារម្ភនោះដែរ ៕

ប្រែសម្រួលដោយ÷ ប៉ោ កុសល