ព័ត៌មានអន្ដរជាតិ
ហៃទី ប្រកាសអាសន្ន ខណៈប្រទេសកំពុងវឹកវរខ្លាំង
តាមសេចក្តីរាយការណ៍របស់ Reuters នៅថ្ងៃចន្ទទី៤ខែមីនា, ហៃទី បានប្រកាសដាក់ប្រទេសក្នុងគ្រាអាសន្នរយៈពេល៣ថ្ងៃ ព្រមទាំងដាក់បម្រាមគោចរពេលយប់នៅក្នុងនិងជុំវិញរដ្ឋធានីផងដែរ ដោយសារតែអ្នកទោសហែកគុកចំនួន២កន្លែង។
យោងតាមសេចក្តីថ្លែងការណ៍របស់រដ្ឋាភិបាល ពន្ធនាគារចំនួនពីរ ដែលមួយស្ថិតនៅក្នុងរដ្ឋធានី Port-au-Prince និងមួយទៀតស្ថិតក្នុងទីក្រុង Croix des Bouquets នៅក្បែរនោះ ត្រូវបានក្រុមបងធំសម្រុកចូលវាយប្រហារកាលពីចុងសប្តាហ៍កន្លងទៅ ដែលនាំឲ្យមានការកាប់សម្លាប់មនុស្ស១២នាក់ និងដោះលែងអ្នកទោសប្រហែល៤០០០នាក់។
ដោយឡែក យោងតាម BBC, ក្នុងចំណោមអ្នកជាប់ឃុំទីនោះ ក៏មានសមាជិកក្រុមបងធំដែលត្រូវបានចោទប្រកាន់ពាក់ព័ន្ធការធ្វើឃាតប្រធានាធិបតី Jovenel Moïse កាលពីឆ្នាំ២០២១ដែរ។
អំពើហិង្សានេះកើតឡើងខណៈមេក្រុមបងធំដែលគ្រប់គ្រងសឹងតែ៨០%នៃរដ្ឋធានីនិយាយថា ពួកគេចង់ឲ្យលោកនាយករដ្ឋមន្ត្រី Ariel Henry លាលែងពីតំណែង។
ប៉ុន្មានឆ្នាំចុងក្រោយ អំពើហិង្សានៅប្រទេសហៃទី កាន់តែធ្ងន់ធ្ងរឡើងៗ ហើយអំពើហិង្សានេះ បានចាប់ផ្តើមកាលពីថ្ងៃព្រហស្បតិ៍សប្តាហ៍មុន នៅពេលនាយករដ្ឋមន្ត្រី Henry ធ្វើដំណើរទៅកាន់ទីក្រុងណៃរ៉ូប៊ី ដើម្បីពិភាក្សាអំពីការបញ្ជូនកងកម្លាំងសន្តិសុខពហុជាតិសាសន៍ដឹកនាំដោយកេនយ៉ា ទៅកាន់ប្រទេសហៃទី។
ចាប់តាំងពីលោកប្រធានាធិបតី Moise ត្រូវគេធ្វើឃាត, មកទល់ពេលបច្ចុប្បន្ន ប្រទេសហៃទី មិនទាន់រកអ្នកជំនួសតំណែងគាត់បានឡើយ រីឯការបោះឆ្នោត ក៏មិនបានធ្វើឡើងដែរតាំងពីឆ្នាំ២០១៦មក។
នៅក្រោមកិច្ចព្រមព្រៀងនយោបាយមួយ ការបោះឆ្នោតនឹងត្រូវរៀបចំឡើង ហើយលោក Henry នឹងត្រូវចុះចេញនៅថ្ងៃទី៧ខែកុម្ភៈ ប៉ុន្តែរឿងនោះមិនបានកើតឡើងទេ។
តាមរបាយការណ៍របស់អង្គការសហប្រជាជាតិ, មនុស្សជាង៨៤០០នាក់ បានក្លាយជាជនរងគ្រោះនៃអំពើហិង្សារបស់ក្រុមបងធំកាលពីឆ្នាំមុនដូចជាការសម្លាប់និងចាប់ពង្រត់ជាដើម ពោលគឺច្រើនជាងឆ្នាំ២០២២ ដល់ទៅទ្វេដងឯណោះ៕
អត្ថបទ៖ សុខ សុវណ្ណ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ