៥៥ខេត្តនៅថៃ កំពុងរងគ្រោះដោយខ្យល់ពុល ក្នុងកម្រិត ដ៏គ្រោះថ្នាក់

តាមការចុះផ្សាយរបស់ Bangkok Post, នៅព្រឹកថ្ងៃព្រហស្បតិ៍ទី៧ខែមីនា ផ្សែងអ័ព្ទក្នុងកម្រិតដ៏គ្រោះថ្នាក់ បានគ្របដណ្តប់ខេត្តចំនួន៥៥ក្នុងចំណោមខេត្តទាំង៧៧របស់ថៃ ខណៈក្នុងនោះ មានខេត្តចំនួន២៧ ភាគច្រើនៅប៉ែកខាងជើងនិងឦសាន ដែលខ្យល់ពុល បានឈានដល់កម្រិតគ្រោះថ្នាក់បំផុត ពណ៌ក្រហម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារអភិវឌ្ឍន៍បច្ចេកវិទ្យាអវកាសនិងព័ត៌មានវិទ្យា (Gistda) បានរាយការណ៍ថា ខេត្តដែលរងការបំពុលខ្លាំងជាងគេបំផុតគឺឈៀងរ៉ៃ ពោលគឺក្នុងរយៈពេល២៤ម៉ោងចុងក្រោយ កំហាប់ភាគល្អិត PM2.5 បានឈានដល់ ១២៨.៨មីក្រូក្រាមក្នុងមួយគូបនៃខ្យល់ លើសពីកម្រិតសុវត្ថិភាពដែលរដ្ឋាភិបាលកំណត់ត្រឹម៣៧.៥មីក្រូក្រាមក្នុងមួយគូបប៉ុណ្ណោះ។

ស្របពេលជាមួយគ្នានោះដែរ ២៧ខេត្តដែលភាគច្រើនស្ថិតនៅក្នុងតំបន់ទំនាបកណ្តាល គឺត្រូវគ្របដណ្តប់ដោយខ្យល់ពុលកម្រិតពណ៌ទឹកក្រូច។ ទោះបីជាយ៉ាងណាក៏ដោយ នៅរាជធានីបាងកក កម្រិត PM2.5 គឺមានសុវត្ថិភាព។

PM 2.5 គឺជាកំហាប់តូចៗ ដែលមានអង្កត់ផ្ចិត២.៥មីក្រូម៉ែត្រ ឬតូចជាងនេះ ដែលអាចជ្រៀតចូលទៅក្នុងចរន្តឈាម ឬសូម្បីតែសួត ហើយការប៉ះពាល់ធាតុបំពុលទាំងនេះ អាចបណ្តាលឲ្យរលាកនិងរមាស់ក្នុងភ្នែក និងស្បែក ក៏ដូចជាក្អក និងតឹងទ្រូងផងដែរ។

ព័ត៌មាននេះកើតឡើងមួយថ្ងៃ បន្ទាប់ពីរបាយការណ៍របស់ AFP ចេញផ្សាយថា ប្រជាជនថៃជាង១០លាននាក់ បានធ្លាក់ខ្លួនឈឺជំងឺដែលជាប់ទាក់ទងនឹងខ្យល់ពុលក្នុងឆ្នាំ២០២៣។

ត្រឹមដើមឆ្នាំនេះ គេបានឃើញមានការកើនឡើងនៃករណីជំងឺទាក់ទងនឹងការបំពុលបរិយាកាសរួចទៅហើយ បើធៀបនឹងឆ្នាំមុន ខណៈ​ AFP រាយការណ៍ថា ក្នុងរយៈពេល៩សប្តាហ៍ដំបូងនៃឆ្នាំ២០២៣ ប្រជាជនថៃ ដែលធ្លាក់ខ្លួនឈឺជំងឺទាក់ទងនឹងអាកាសធាតុមិនល្អមានចំនួន១.៣លាននាក់ បើធៀបនឹងដើមឆ្នាំ២០២៤នេះ តួលេខបានហក់ឡើងដល់១.៦លាននាក់ទៅហើយ។

ករណី​ទាំង​នោះ ​រួម​មាន​អ្នក​ដែល​មាន​ជំងឺ​រ៉ាំរ៉ៃ​ដូច​ជា មហារីក​សួត រលាក​ទងសួត ជំងឺហឺត និង​ជំងឺ​បេះដូងជាដើម៕

អត្ថបទ៖ សុខ សុវណ្ណ

ចុចអាន៖ មួយឆ្នាំ ប្រជាជនថៃ ជាង១០លាននាក់ ធ្លាក់ខ្លួនឈឺ ដោយសារខ្យល់ពុល